Puerto Ricomi anngunniunneq
Puerto Rico: Anngunniunnissaq sioqqullugu ajugaaneq
Nuna unammiffiusussaq Puerto Rico, arfininngormat sungiusaatigalugu unamminermi kalaallinit arnanit assammik arsartartunit ajorsartinneqarpoq
Amerikap Nunavissuani Pissartanngorniunnissamut anngunniulluni unammiuaarnissami, Puerto Rico-mi ingerlanneqartussami, kalaallit arnat assammik arsartartut ataasinngorpat siullermik unamminerminni USA unammissavaat.
Arfininngormat nunanut unammiffiusussamut Puerto Ricomut sungiusaatigalugu unamminermi kalaallit arnat assammik arsartartut ajugaapput.
Arfininngormat unnukkut kalaallit Puerto Rico 29-26-mik ajugaaffigaat, muminnermi 14-9-mik siuaqqasimallutik.
Sungiusaasup ikiortaa naammagisimaarinnippoq
Nunanut allanut unammisartut sungiusaasuata ikortaa Johannes Groth naapertorlugu kalaallit arsarluarput, pitsaasumik nakkutigisaasumillu saassussisarlutik, aammattaarli assersuilluarlutik.
Ilimagineqarsimavoq kiannersua kalaallinut unammilligassaassasoq, taamaattumillu unamminermi unammisartut taarsigaateqattaarneqartorujussuupput. Målmandit marluk piffissami aalajangersimasumi unammisinneqarput unammilluaqalutillu - pingaartumik unamminermi minutsini kingullerni 15-ini Rina Lorentzen pingaarutilinnik annaassisarpoq, taamaasillunilu Kalaallit Nunaat ajugaasinnaatillugu, Kalaallit Nunaanni Assammik Arsartartut Kattuffiat tusagassiorfinnut nalunaarutikkut paasissutissiivoq.
Nunanut allanut unammisartut sungiusaasuat Jakob Andreasen, maanna Danmarkimi Håndboldliga-mi slutspil-imi Silkeborg-Voel KFUM-imi sungiusaasuusoq, siusinnerpaamik Puerto Ricomut tikissinnaavoq Kalaallit Nunaat finalimut anngutissagaluarpat.
Danmarkimi VM-imut aqqut
Arnat assammik arsarlutik unammisartut, pingaarnerusumik aningaasaliisoqanngitsut, Amerikap Nunavissuani Pissartanngorniunnissamut anngunniulluni unammiuaarnermi siullermik unammissapput ataasinngorpat marsip 30-anni, tassani Kalaallit Nunaata sumiiffimmi nalunaaqutaq malillugu nalunaaqutaq 16.00 (kitaani nalunaaqutaq 18.00) USA unammissammagu.
Unammiuaarneq ingerlanneqassaaq ataasinngornermiit sapaat ilanngullugu.
Cuba, nunanillu unammeqataasunit arfinilinnit angusarissaarnerit sisamat Amerikap Nunavissuani Pissartanngorniunnissamut anngutissapput, tamannalu ingerlanneqassaaq Cubami Havana-mi maajip 21-anniit maajip 28-annut.
Amerikap Nunavissuani Pissartanngorniunnermi angusarissaarnerpaat sisamat Danmarkimi decembarimi VM-eqarnissaanut anngutissapput.