kvalifikation i Puerto Rico
Kalaallit unamminermi siullermi naligiittut
Kalaallit assammik arsaattartui arnat ippassaq ataasinngornermi Panamerikami pissartanngorniunnissamut anngunniunnerit aallartinneqarmata unamminermi siullermi pointinnapput
26-26.
Ipaassaq ataasinngornermi kalaallit nunanut allanut unammisartuisa Puerto Ricomi USA naapikkamikku, unammineq taama inerneqarpoq.
Kalaallit sungiusaasuata ikiortaa oqaluttuarpoq, USA-miut arnartai kalaallinit nukittuneroqisut, taamaakkaluartorli kalaallit sukkassusertik saassussilluartarnertillu pointinnassutigigaat.
Piareersarnissamut periarfissat amigaataasut
- Kalaallit sungiusaaatigalugu unammisarnissaq aammalu piareersarnissamut periarfissat nunanut allanut naapertuuttut pisariaqartikkaat ippassaq unamminerup takutippaa. Holdit allat timikkut nukittunerupput, uagullu arsalerisinnaanerput, arsariaatsimut paasinnittaaserput sukkassuserpullu atorluarniartariaqassavagut. Piareersarnissamut periarfissaginnerusimasuugutta USA-mut ajugaasimasinnaagaluarpugut, taamaakkaluartoq pointinnannerput tulluusimaarutigalugulu nuannaarutigaarput, Johannes Groth tusagassiutinut nalunaarummi allappoq.
Ajoraluartumik unamminermi kikkut isertitsisuusimanersut aqqissuisoqarfiup pissarsiarinngilai. Ullumi marlunngornermi Nunatta kitaata nalunaaqutaa malillugu arfinermut kalaallit arnartaasa Mexico unammissavaat.
Danmarkimi VM-imut aqqut
Anngunniunnerit ataasinngornermiit sapaat ilanngullugu ingerlanneqassapput. Cuba aammattaaq nunat angusarinnerit sisamat Panamerikami pissartanngorniunnissamut ingerlaqqissapput. Pissartanngorniunnerit Cubap illoqarfiani Havanami maajip 21-anit 28-anut ingerlanneqassapput. Panamerikami pissartanngorniunnermi, Pamamerikanske Mesterskabimik taaneqartartumi, angusarinnerit sisamat VM-imut Danmarkimi decemberimi pisussamut ingerlaqqissapput.