Jens-Erik Kirkegaard: Anneruniarput
Qallunaat isornartorsiuineq tigusariaqaraat, Siumumi politikkikkut oqaaseqartartoq, Jens-Erik Kirkegaard isumaqarpoq
Vittus Qujaukitsup qallunaanik isornartorsiuinera Jens-Erik Kirkegaardimit Siumumeersumit taperserneqarpoq. Qujaukitsup qallunaat anneruniarnerarlugit oqariartuuteqarnermi kingorna oqallitsitsinerani, qallunaanit oqariartuutigineqartut qisuariarfigai.
Atuaruk: Siulittaasuusimasut Vittus taperserpaat
Ilaatigut historikeri aamma Politikenimi aaqqissuisuunerusimasoq, Bo Lidegaard Politikenimi oqariartuuteqarpoq, Kalaallit Nunaata aamma Danmarkip ataatsimut oqaluttuarisaanerannut tunngatillugu anneruniarneq, pisuussut aamma kanngusunneq oqallisigiunnaassagaat.
- Qisuariarnerit nalinginnaasut tassaakkajupput misiarneq aammalu paasinninniannginneq annikitsuinnarmilluunniit paasinninniarneq sooq ikinngutigiinni aappaa taama misigisimasoq. Tamanna tassaannginnerluni anneruniarneq, Siumup politikkikkut oqaaseqartartua maanna tusagassiuutinut nalunaarummi oqarpoq.
Atuaruk: Vittup Danmark USA-lu sioorasaarpai
Isornartorsiuinermut tusarnaaritsi!
Ajornartorsiut tusaajumanngiinnarnagu, kalaallit politikeriisa oqariartuutigisaat Danmarkimi tusaaneqarlutillu iliuuseqarfigineqartarnissaat, Jens Erik Kirkegaardip takorusunnerugaluarpaa.
- Siumumiit Danmarkimut kaammattuutigissavarput akisussaaffimmik tiguseqqullugit, isornartorsiorneqarneq tigoqqullugu, aaqqiniarnerlu siunertaralugu oqaloqatigiinnerit ingerlateqqullugit, ikinngutigiinnerlu siuarsaaqataaffigalugu, tusagassiuutinut nalunaarummi tamanna allaqqavoq.
Oqaatsit inuiaqatigiinnut mattussisut
Jens Erik Kirkegaardip naammagisimaarinnginneq arlalinnik pissuteqartoq tikkuarpaa.
- Siumumiit pakatsivugut paasinninniarsarineq taama annikitsigimmat, Danmark anneruniarneranik isiginninneq pissutaannaangitsoq politikkikkut suliat qaffasissut ... Aammali ulluinnarni atukkanut attuumassutillit, inuit arlaqartut isumaqarput Kalaallit Nunaat marloqiimmik oqaaseqarfiusoq (kalaallisut qallunaatullu), kisianni allagartarpassuit tamat ornittagaanni pisiniarfippassuarnilu qallunaatuinnaapput.
Atuaruk: Oqaatsinik ilisimatooq: Tuluit oqaasiisa kalaallit oqaasii akoorsinnaavai
Anneruniarnerunnginnerluni kalaallisut oqaatsit, taamaasillunilu kalaallisuinnaq oqaasilippassuit, nunaminni akuutinneqarunnaarnerat?, politikeri aperivoq, oqaatigaalu tamanna susassaqarfiugaluartoq, inuiaqatigiinni kamannermut sunniuneqaqataanerarpai.
Nalilersuissanngitsoq
Qallunaat suleqatigiinniarnermi pissutsit ilaannik ajornartorsiortitsisoqarnera nassuerutiginnittariaqartut, taanna isumaqarpoq.
- Siumut nalilersuissanngilaq Danmark pisuussuteqartutut kanngusunnermilluunniit misigissannersoq ikinngutigiinnermi matumani, kisianni Kalaallit Nunaata Danmarkimiit tusartuaruniuk taamaannginneraaneq, taava ikinngutigiinneq pitsaasumik siuarsaruminaassooq, Jens Erik Kirkegaard oqarpoq.