sunniuteqaqataarusunneq
Vittup Danmark USA-lu sioorasaarpai
Naalagaaffeqatigiinneq pillugu Vittus Qujaukitsoq uissumiinartumik danskit aviisiannut oqaaseqarpoq
Kalaallit Nunaata nunanut allanut sillimaniarnermullu politikkimut suniuteqarnerujumalluni kissaateqarnera danskinit isiginngitsuusaarneqarnera anneruniarnerusoq Vittus Qujaukitsoq isumaqarpoq. Taamaammat USA Savissivimmit anisissallugu naalagaaffeqatigiikkunnaarnissarlu sioorasaarutigaa.
Nunarpassut uissuumissutigaat
Sioorasaarineq danskit aviisianni ullumi saqqummertumi Politikenimi allaaserineqarpoq. Allaaserisarluni Danmarkimi nunanilu allanilu aviisinit arlalinnit issuaaffigineqarluni.
- Anneruniarneq naalagaaffeqatigiinnermut sequtserisuuvoq, Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut Naalakkersuisoq Vittus Qujaukitsoq danskit aviisiannit apersorneqarnermini ilaatigut oqarpoq.
Amerikarmiut Savissivimmi sakkutooqarfeqalernissaanut Danmarkip USA-llu 1941-mi isumaqatigiinnerat "Ukiuni 75-ni pakatsisimanermik pissaaneerunnermillu kinguneqartut" Vittus Qujaukitsoq apersorneqarnermini oqarpoq.
Aalisarnermut sunniuteqannginneq
Kalaallit Nunaata aalisarnermut sunniuteqaqataasinnaanera aamma Danmarkimit arsaarinnissutaasimanerarlugu pisuutippaa. Tamanna Nafo-mi NEAFC-milu, tassa nunani avannarlerni aalisarnermut aaqqissuisoqarfiit, ilaasortaaqataatitsinnginnermit pinerarlugu.
- Kalaallit Nunaat pimoorunneqanngitsoq ukiorpassuarni nipaarluunerup toqqorterinerullu Danmarkip tungaanit takussutissaavoq, Politikenimut oqarpoq.
Saassussineq ilungersunartoq
Vittus Qujaukitsup oqariartuutai politikkikkut paasisimasalinnit uissuuminartuutinnerarneqarpoq.
- Naalagaaffeqatigiinnerup sannaanut saassussineruvoq sakkortooq. Danmarkimut kimigiiserfiginninnissaq piffissami ajornerpaami anguniarneqarpat iluatsittutut taaneqarsinnaavoq, Sakkutuunngorniarfimmi pisortaq Nils Wang Politikenimut oqarpoq.
Amerikami præsindentinngortussap Donald Trumpip Kalaallit Nunaata atorneranut akileeqquneqarnissani nuannarivallaarunnanngikkaa erseqqissarpaa. Danmarkip "nunanut allanut politikkianut Nunanut avannarlernut sunniuteqaqataasumik kingunerlussinnaasoq" taama pisoqassagaluarpat inernilerpaa.
Vittus Qujaukitsup NATO-p generalsekræteria Jens Stoltenberg novembari naalersoq ataatsimeeqatigaa. Tassani Naalakkersuisut Kalaallit Nunaata inissisimanera nunanilu tamalaani pissaaneqarnerulerusunnermik kissaateqarnerat erseqqissaassuteqarfigalugu.