tapersersuineq
Siulittaasuusimasut Vittus taperserpaat
Aleqa Hammondip Lars-Emil Johansenillu Vittus Qujaukitsoq taperserpaat
Siumup siulittaasuata Kim Kielsenip naalakkersuisup Vittus Qujaukitsup danskit nutaarsiassaqartitsivianut Politikenimut oqariartuutai aalassatsitsingaatsiartut isumaqatiginagit ippassaq nalunaaruteqarpoq.
Siumumili siulittaasuunikut marluk maanna Vittus Qujaukitsumut tapersiinertik takutippaat.
- Danskit tupaallaatigisussaanngikkaluarpaat Nunatsinnut pissusilersornertik pillugu uparuaasoqarnera, Aleqa Hammond TV2-mi allaaserisamut ”Grønland i usædvanligt angreb mod Danmark: I er arrogante" qulequtalimmut isummersorluni allappoq.
Atuaruk: Vittus uummaarissumik oqallitsitsisoq
Allaaserisaq Politikenimi nutaarsiassamut issuaaneruvoq, tassani Vittus Qujaukitsup USA Pituffimmit anisissallugu naalagaaffeqatigiikkunnaartoqassasorlu sioorasaarilluni oqariartuuteqarneranit.
- Aammalu Nunarput naalagaaffinngorumasoq uissuumissutigisussaanagu, folketingimi ilaasortaq Aleqa Hammond facebookimi isummersorluni allappoq.
Vittusimut qujavoq
Vittus Qujaukitsoq tusagassiuutitigut ippassaq tupaallatsitsilluni isummersoreersorluni aamma allamit tuikkut pattalaarneqarpoq.
- VITTU nersorpakkit taperserlutillu, Lars-Emil Johansen facebookimini allappoq.
Siumumi siulittaasuusimasup Vittus Qujaukitsup pissutsinut toqqaannarluni isummersornera nersualaarpaa.
- Kiisami Kalaallit Nunatta soqutigisai aallaavigalugit Nunatta Danmarkillu akornanni pissutsit naalakkersuisunut ilaasortamit oqaaseqarfigineqarput, Inatsisartut siulittaasuat Lars-Emil Johansen allappoq.
Atuaruk: Issittumi suleqatigiinneq isornartorsioraa
Siumumili siulittaasup naalagaaffeqatigiit iluanni ikioqatigiittoqarnissaanut kaammattuivoq. Ippassarlu oqallinnermut takkajaamik isummani saqqummiuppai, ilaatigut ima oqariartuuteqarluni:
- Isumaqarpunga illuatungeriit tamarmik iluaqutigisinnaasaat nunattalu ineriartorneranut iluaqutaasussaq anguniarlugu Naalakkersuisut danskillu naalakkersuisuisa suleqatigeeriasiat innarlernaveersaarlugu pitsaasumik inerisarniartariaqaripput, Kim Kielsen oqarpoq
Atuaruk: Kimip Vittusi isumaqatiginngilaa
Nunanulli allanut tunngasunut politikkikkut suliaqarneq sukkanerpaamik Kalaallit Nunaannit aqunneqalertariartoq Lars-Emil Johansen isumaqarpoq.
- Nunatta namminersulivinnissaa utaqqinagu piaarnerpaamik nunanut allanut tunngasuni oqartussaaffik tamakkiisut Nunatsinni naalakkersuisut Nunattalu Inatsisartuisa tigusariaqarpaat. Danmarkip tunngaviusumik inatsisaa najoqqutaralugu tamanna ajornartorsiutitaqarsimappat, tamanna qalllunaat ajornartorsiutissaraat uaguunngitsoq, allappoq.
Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut Naalakkersuisoq tapersersorlugu oqariartuutigaa.
- Nunanut allanut naalakkersuisoq, Vittus Qujaukitsoq, tamakkiisumik taperserpakkit. Piffissanngorpormi alloriaqqinnissatsinnut, Lars-Emil Johansen naggasiivoq.