IA Nunaoil pillugu suli akineqarusuppoq

Nunaoil A/S-p siulittaasua, Frank D. Pedersen, siulersuisunit oktobarip arfineq-aappaani tunuarpoq. Tamanna pivoq Frank D. Pedersenip Naalakkersuisut siulittaasoqarfianik Nunaoil A/S-ip 2017-imiit tapiissuteqarfigineqaqqulluni kissaateqartareernerata kingorna.

Frank D. Pedersenip tunuareernerata kingorna, siulersuisunut ilaasortaq ataaseq minillugu, siulersuisut sinneri 8. oktobari ataatsimeeqatigereerlutik ingerlaannartumik atuutilersumik tunuarput.

Tamatuma kingorna Nunaoil A/S-ip siulersuisoqarnermigut innarlersimasup qanoq ingerlanneqarnera erseqqissumik oqaatigineqarnikuunngilaq.

Atuaruk: Nunaoilimi aalassassimaartoqarpoq: Siulersuisut ingerlaannartumik tunuartut

Inuit Ataqatigiit suut piumasaqaataasimanersut tusarusuppaat
Maannalu Inuit Ataqatigiit siulittaasuat, Sara Olsvig, Naalakkersuisut siulittaasorigallagaannut Siumumeersumut, Kim Kielsenimut, Nunaoilip inissisimanera pillugu apeqquteqaateqarpoq.

- Qinersisoqarnissaata suaarutigineqarnerata kinguninngua Nunaoilip siulersuisui tunuarput. Peqqutigisaat erseqqippoq. Naalakkersuisunit piumasaqaatit allanngorsimasut piviusunngortissinnaanagit siulersuisuusimasut isumaqarput, Sara Olsvig aallartippoq.

- Naalakkersuisuniilli sunik piumasaqaateqartoqarsimava? Qinersinissallu suaarutigineqarnerata kingorna, politikkikkut aalajangigassat uninngatinneqarsimasussaagaluartut, aatsaat piumasaqaatit saqqummiunneqarpat?, Sara Olsvig Inuit Ataqatigiit sinnerlugit taama apeqquteqarpoq.

Atuaruk: Nunaoil: Siulersuungallartussat ivertinneqalerunarput

Naalakkersuisut siulittaasorigallagaat, Siumumeersoq Kim Kielsen, Sara Olsvig malillugu marloriarluni partiinik ataatsimiisitsimavoq qinersinissap suaarutigineqareerneratigut. Kisianni Nunaoilip inissisimanera pillugu partiit ilisimasaqarfiginerulinngisaannik.

- Ataatsimiinnerni taakkunani Nunaoil pillugu erseqqissunik akisoqarnissaa piumasaqaatigisaraluarparput. Maannamut suli akineqanngilagut tamannalu ernumassutigaarput, Sara Olsvig oqarpoq.

Qinersinissap suaarutigineqarnerata kingorna iliuuseqartoqarpa?
Taamaammat Inuit Ataqatigiinni maanna paaserusunneqalerpoq Naalakkersuisut qinersinissap suaarutigineqarnera sioqqullugu kingoqqulluguluunniit Nunaoil pillugu aalajangiussaqarsimanersut:

- Naalakkersuisunut inassuteqassaagut Nunaoilimut oqaaseqaatertik avammut saqqummiutissagaat. Innuttaasut Inatsisartullu pisunik ilisimatinneqartariaqarput. Taama iliortoqarsimassanngippat Naalakkersuisut siulittaasuat nassuiaasariaqassaaq, Sara Olsvig oqarpoq.

Atuaruk: Nunaoil: IA-p partiit siulittaasui ataatsimeeqatigiitsikkusuppai