aatsitassat
Nunaoil: IA-p partiit siulittaasui ataatsimeeqatigiitsikkusuppai
Inuit Ataqatigiit Naalakkersuisut siulittaasorigallagaat, Kim Kielsen, partiit siulittaasuinik ataatsimiigiaqqusissasoq maanna piumasaraat
Nunaoilimi siulersuisuni siulittaasup Frank D. Pedersenip Naalakkersuisunut siulittaasup naalakkersuisoqarfiannik ataatsimeeqateqarsimanerata kingorna siulersuisunut siulittaasutut marlunngormat tunuarpoq.
Siulersuisuni siulittaasoq isumaqatigalugu siulersuisuni ilaasortat pingasut aamma tunuarput pingasunngornermi ingerlaannartumik. Siulersuisuni siulersuisut ataaseq minillugu tunuartut tassaapput Tine Pars, Olav Boye, Sivertsen Naja Joelsen aamma Peter Helmer Steen.
Taamaallaat Peter Helmer Steen danskit naalagaaffiata sinniisuutitaa tunuanngilaq, taamaattoq siulersuisunut ilaasortat sinnerisa isummernerannut isumaqataavoq.
Atuaruk: Nunaoilimi aalassassimaartoqarpoq: Siulersuisut ingerlaannartumik tunuartut
Inuit Ataqatigiit akissutiserusupput
Maanna Inuit Ataqatigiinnersoq Naaja Nathanielsen tusagassiuutinut nalunaaruteqarluni Naalakkersuisut siulittaasorigallagaata Kim Kielsenip partiit siulittaasuinut aggersaanissaa piumasaraa. Inuit Ataqatigiimmi apeqqutiminnut ukununnga arlalinnut akineqarusupput:
- Naalakkersuisuugallartut ingerlatseqatigiiffimmut piumasaqaatitigut tunngaviatigut allannguisunik Nunaoil A/S-ip sipaarniuteqarnissaanik piumasaqarsimanerat ilumoorpa? Aammalu tamanna qinersinissamik nalunaaruteqarnerup aatsaat pereerneratigut nalunaarutigineqarsimasoq ilumoorpa?
- Ilumoorpa akuliuttussaannginnermut tunngaviatigut isumaqarneq Naalakkersuisunit ataqqineqarsimanngitsoq, sipaarniutissanillu aalajangersimasunik peqqusinikkut siulersuisut piginnaatitaanerannut akuliuttoqarsimasoq? Tassunga atatillugu oqaaseqaat Nunaoilimut nassiunneqarsimasoq takorusupparput.
- Nunaoil A/S maanna siulersuisoorussimatillugu illersorneqarsinnaasumik aqunneqarnissaanut Naalakkersuisut qanoq qulakkeerinninniarpat? Erseqqissaatigissavarput qineqqusaartoqartillugu Naalakkersuisut siulersuisunik nutaanik toqqaasinnaatitaanngimmata. Taamaattumik Naalakkersuisut malittarisassat naapertorlugit aaqqiissutissamik allamik nassataqarlutik ataatsimiinnermut aggeqquneqarput.