Nunaoil: Siulersuungallartussat ivertinneqalerunarput

(Allaaserisaq sapaammi nal. 13.07 nutarterneqarpoq ilisimatitsissutigineqarmat siulersuisuugallartussat immaqa ivertinneqarumaartut aktieselskabit pillugit inatsisit selskabimilu malittarisassat naapertorlugit)

KNR-imit tamanna oqaluttuarineqarpoq.

Nunaoil A/S-p siulittaasua, Frank D. Pedersen, siulersuisunit marlunngormat tunuarpoq. Tamanna pivoq Frank D. Pedersenip Naalakkersuisut siulittaasoqarfianik Nunaoil A/S-ip 2017-imiit tapiissuteqarfigineqaqqulluni kissaateqartareernerata kingorna.

Frank D. Pedersenip tunuareernerata kingorna, siulersuisunut ilaasortaq ataaseq minillugu, siulersuisut sinneri pingasunngornermi ataatsimeeqatigereerlutik ingerlaannartumik atuutilersumik tunuarput.

Atuaruk: Nunaoilimi aalassassimaartoqarpoq: Siulersuisut ingerlaannartumik tunuartut

Naalakkersuisut siulittaasorigallagaata, Siumumeersup Kim Kielsenip, maanna oqaluttuaraa misissorneqartoq utaqqiisaangallartumik allaffissornikkut siulersuisussanik ivertitsisoqarsinnaanersoq aktieselskabet pillugit inatsisit Nunaoil A/S-illu malittarisassai naapertorlugit.

- Malittarisassat malillugit qanoq ittoqassanersoq qulaajaasussaavugut, allaffeqarfiullu tamakku qulaajarpaat. Taavalu piginneqatigiiffimmut malittarisassaat malillugit aamma qulaajariarlugit qanoq inissittoqarnissaa eqqarsaatersuutigineqassaaq, Kim Kielsen KNR-mut tallimanngornermi taama oqarpoq.

Atuaruk: Nunaoil: IA-p partiit siulittaasui ataatsimeeqatigiitsikkusuppai

Aamma Kim Kielsenip, KNR-ip allaaserisaa najoqqutaralugu, partiit siulittaasuinik naapitsinissani tunuarsimaaffiginngilaa:

- Kisianni akissutissaq taannaassaaq: - misissugassat misissulaaqqaartigit, malittarisassat qanoq oqariartuuteqarpat qanorlu ingerlasoqassava, Naalakkersuisut siulittaasorigallagaat, Kim Kielsen, KNR-imut oqarpoq.