Kuannersuit
GME: Uranimik piiaaffik uloriananngilaq
Kuannersuarmi piiaaffimmit Narsami imeq ajortinneqarnavianngitsoq, GME-p pisortaa isumaqarpoq. Taanna mailikkut DR Nyhederimut allappoq.
Kuannersuarnup piiaaffissatut suliniummut avatangiisinut nalunaarusiaq missingiut avatangiisinut illersuiniaqatigiiffiit tallimat sapaatip-akunneri marluk matuma siorna sakkortuumik isornartorsiorpaat.
GME-p pisortaata John Mairip mailikkut DR Nyhederimut ilumuunnginnerarpaa. Tamatuma saniatigut avatangiisit pillugit nalunaarusiaq naammassilluni tusarniaassutigineqalerpat aatsaat oqallisigineqarnissaanut kaammattuivoq.
Atuaruk: Isertortumik uranisiornermut nalunaarusiaq saqqummiunneqarpoq
Radioaktivit siaruarnissaat GME-p ilumuunnginneraraa
Avatangiisinut illersuiniaqatigiiffiit tallimat, ilaatigut Avataq aamma Urani Naamik, Kuannersuarni uranimik saffiugassanillu qaqutigoortunik piiaanissamut misissuinerup VVM-mik taasap missingiutaata ilaa marsip 10-anni saqqummiunniarlugu aalajangerput.
Saqqummiunneqarnerani isornartorsiuipput, avatangiisinut illersuiniaqatigiiffiit radioaktiviusut silaannakkut imaatigullu siaruaassinnaanerat tassani isumaqarput. Tamatuma saniatigut sinneruttut eqqakkat tatsip naqqaniitinneqarnissaat illersorneqarsinnaannginnerarpaat.
Atuaruk: Marraap radioaktiviusup sisunissaa ilisimasallip ernummatigaa
Isornartorsiorneqartut taakku tamaasa John Mairip ilumuunnginnerarpai.
- Misissueqqissaarnikuuvugut, tamatuma takutippaa piiaaffimmut atatillugu qinngornerit sakkortusinissaat annikitsuararsuussaaq, taanna DR-ip nutaarsiassaqartitsivianut allappoq.
Saniatigullu sinneruttut eqqakkat tailingsinik taagorneqartut Tasermiitinneqarnissaat 'tulluarluinnarnerarpaa'.
Atuaruk: GME-p suliniutaanut avatangiisinut sunniutinut nalunaarusiaq AG-mit takoqqusaanngitsoq
Nalunaarusiaq ukiaru naammassissaaq
GME-p aatsitassanut oqartussaqarfinnut nalunaarusiaq VVM juulli sioqqullugu nassiuppaa. Kisianni avatangiisinut aqutsisoqarfiup nalunaarusiap tusarniaatigineqannginnerani paasissutissanik amerlanerusunik piumasaqarput. Nalunaarusiap ukiaanerata ingerlanerani naammassinissaa John Mairip DR-imut nalilerpaa.
Atuaruk: Aatsitassalerinermi oqartussat GME-mit paasissutissanik amerlanerusunik perusupput
Avatangiisinut nalunaarusiap missingiutaasup allagaatinik takunnikkumalluni noqqaanermut GME itigartitsinikuuvoq. Marsip aallartinnerani aatsitassat pillugit avatangiisinut aqutsisoqarfiup AG-mut aamma DR-imut allagaatinik takunnikkumanermut itigartitsivoq, siullermik DR neriorsorneqareersoq nalunaarummillu nassiussiffigineqareersoq. Tamatuma kingorna avatangiisinut illersuiniaqatigiiffiit nalunaarusiamit paasissutissat saqqummiunniarlugit aalajangerput.