Timersoqatigiit Kattuffianni generalsekretærissaq toqqarneqarpoq
38-nik ukiulik Jonas Jensen Kalaallit Nunaanni Timersoqatigiit Kattuffianni generalsekretærinngussaaq
Kalaallit Nunaanni Timersoqatigiit Kattuffiat oktobarip aallaqqaataani nutaamik generalsekretæreqalissaaq. Carsten Olsen, upernaaq manna atorfimminit tunuartumik taarsiisussatut toqqarneqartoq tassaavoq Jonas Jensen.
Taanna Kalaallit Nunaanni Timersoqatigiit Kattuffianni aaqqissuussaanermut atatillugu siunnersortitut atorfeqarpoq, ilaatigut GIF-ip 2020-imiit 2023-imut periusissiaata ingerlanneqarnissaa akisussaaffigalugu.
- Jonas generalsekretærissatut toqqarparput kattuffiup iluani aaqqissuussinermut sammisutigut timitalersuisarnermilu piginnaaneqarluarnerminik takutitsinikuummat aammalu GIF-imi sulinermigut timersornerup silarsuaani misilittagaqartuummat, GIF-imi siulersuisunut siulittaasuusoq Nuka Kleemann oqarpoq.
Nunarsuarmi nunatta timimik atuiffiunerpaalernissaa anguniarlugu takorluukkagut tunngavigalugit siunnerfilersugaalluartumik suleqatiginissaa isumalluarfigaara. Timersornerummi inerisarneqarnissaa soqutigeqaara, tamanna inuiaqatigiinnut pingaaruteqartuummat, inunnik katersortitsisuulluni ataatsimoorfiulluartarmat, nuannaartitsilluni peqqissumillu sammisaqartitsilluni. Uanga pingaartippara siammasissumik timersorumanerup siammarsarnissaa nalunngilaralu tamanna anguneqassappat ulluinnarni amerlanerit akornanni timimik atuerusussutsip ingerlaavartumik ineriartortinneqarnissaa angujumallugu siunnerfilersugaalluartumik suliniuteqarnissaq pisariaqarmat, tamannalu angujumallugu unammillernartumik sulinissaq GIF-imi suleqatigisat peqatigalugit anguniarnissaa qilanaaraara, Jonas Jensen, oqarpoq.