GIF: Timersornermi nutaanik angusaqartoqassaaq
Nunatsinni ukioq 2019-imi timersornerup tungaatigut pissanganartunik pisoqassaaq. Namminersorlutik Oqartussanit aningaasaliiffigineqarnerunerup kinguneranik Kalaallit Nunaanni Timersoqatigiiffiit Kattuffiata timersorneq aallutarineqarnerulersinniarpaa.
Kalaallit Nunaanni Timersoqatigiiffiit Kattuffia malillugu, 2019 ukiuussaaq timersornerup silarluaani.
Kattuffimmi nutaarluinnarmik pilersaaruteqarpoq, tassa ukioq manna timersornermi festivalertoqassasoq, tamannalu inuiaqatigiit timikkut eqqarsartaatsikkullu peqqinnerulernermik ineriartuutaassasoq isumasiorfiusinnaassasorlu, kattuffik isumaqarpoq.
- Timersorneq nuannersuusoq nalunngilarput aammalu inuit timersornerup silarsuaaneersut timersornermilu ineriartortitserusuttut sapaatip akunnerani timersornermik sammisaqaqatiginissai qilanaaraaput, Kalaallit Nunaanni Timersoqatigiiffiit Kattuffianni siulittaasoq, Nuka Kleemann, tusagassiutinut nalunaaruteqarluni allappoq.
Taassuma saniatigut Kalaallit Nunaat Island Gamesimut peqataassaaq, tassani kalaallit timersortartui eqimatta qeqertanut allanut sulorarnermi, nerrivimmi arsaararnermi, timmisoriagassamik eqqarnermi atletikkimilu unammiuaassallutik.
Kalaallit Nunaanni Timersoqatigiiffiit Kattuffiat tusagassiutinut taama nalunaaruteqarpoq.
Periuseq nutaaq
Kalaallit Nunaanni Timersoqatigiiffiit Kattuffiat, GIF, nunatsinni timersornerup iluani nutaamik periusissiussalluni pilersaaruteqarpoq. Periuseq nutaaq Aallartitat sinniisut novembarimi 2019-imi ataatsimiinneranni saqqummiunneqassaaq tassanilu aamma siulittaasumik toqqaasoqassalluni.
- Periutsimi pioreersumi sammisassanik amerlasuunik aallussinikuuvugut periutsillu nutaami inersiartortinneqassallutik, Kalaallit Nunaanni Timersoqatigiiffiit Kattuffiat taama tusagassiutinut nalunaaruteqarpoq.
Periutsip nutaap ineriartortinnerani kattuffiit, timersoqatigiiffiit, kommunit aningaasaliisartullu Kalaallit Nunaanni Timersoqatigiiffiit Kattufiannit peqataatinneqarput.
Meeqqat atuarfiat aallunneqassaaq
Pilersaarutit taakku saniatigut, Meeqqat atuarfiini ilinniartitsinerup timersornertaqarnerulernissaa Kalaallit Nunaanni Timersoqatiigiiffiit Kattuffiata ujartorpaa. Ilanngullugulu meeqqat atuarfianni eqaarsaartarnerup pitsaanerulernissaa kissaatigaalugu. Anguniagassat angujumallugit kattuffik eqaannerusumik suleqateqarumavoq.
- Timersornerli kisiat pineqassanngilaq, namminersorlutik oqartussat, kommunit, Ilinniarfissuaq, IMAK-ilu aamma oqaloqatigineqarnissaat piumasaqaataavoq, tusagassiutinut nalunaarummi allassimavoq.
Kalaallit Nunaanni Timersoqatigiit Kattuffiat kattuffinnik 9-nik ilaasortaqarpoq, timersoqatigiiffiit kattuffiunngitsut mikisut arlallit aamma ilaasortaallutik.