Kalaallit Nunaanni Timersoqatigiit Kattuffiat nutaamik generalsekretæritaassaaq
Carsten Olsen GIF-imi ukiuni arfineq marlunni generalsekretærioreerluni atorfimminit tunuassaaq
Nunatsinni Timersoqatigiit Kattuffiat oktobarip aallaqqaataani nutaamik generalsekretærertaassaaq.
Carsten Olsen generalsekretæritut nammineq atorfimminit soraarniuteqartoq GIF tusagassiutinut nalunaarummi allappoq.
- Isumaqarama taamatut ingerlariaqqinnissamut piffissaq eqqortuusoq – uannut Kattuffimmullu, Carsten Olsen tusagassiutinut nalunaarummi oqarpoq.
Suliniutit arlallit
Carsten Olsen generalsekretæriunermini ilaatigut Kattuffiup ilusaanik allanngueqataavoq, GUX-imi timersorneq sammivigalugu ilinniarsinnaanermik pilersitseqataasuulluni, nunarput tamakkingajavillugu peqatigiiffinnik ineriartortitsinermut sammisutigut sungiusaasunik piginnaaninngorsaanernik pilersitsilluni maannalu aallartinnikuullugu 2020-imiit 2023-imut periusissanik pilersaarusiorneq.
Periutsinik allanngortitseqataasoq
Kalaallit Nunaanni Timersoqatigiit Kattuffianni siulersuisunut siulittaasup, Nukas Kleemannip Carsten Olsenip aaliangernera ataqqivaa, taannalu imaattunik oqaasertaliivoq:
- Carsten allanngortiterileruttorfimmi Kattuffimmi generalsekretæriuvoq. Periutsit allanngortiternerini peqataavoq isummersuutillu nutaat atorlugit aaqqissuussaanikkut nutaanngorsaaneq ingerlassimallugu maannalu tassa ukiuni aggersuni periusissatut pilersaarutit ingerlallugit. Tunniusimalluni sulisarnera aammalu sunniuteqarluartuunera maqaasissavara, Nuka Kleemann oqarpoq.
Carsten Olsenip suli naluaa, siunissami sumik suliffissaqalerumaarnerluni, tamannali unammiugassatut qilanaarnartutut tiguaa, ineriartortitsinermilu peqataajuarusulluni.