demokratii
Sulisitsisut aviisit piujunnaarnissaat ernummatigaat
Naalakkersuisut tusagassiuutinut tapiissummut aaqqiissutaat nutaaq aviisi nuna tamakkerlugu saqqummertartut atugassarititaat innimiginissaat puigorpaat, Sulisitsisut taama ernummateqarput
Isertortumik tusagassiuutinut tapiissummik atorunnaarsitsisoqartoq, IT-qarnermut brancheudvalgimiit Sulisitsisullu ataani attaveqarnermut tusagassiornermullu attuumassuteqartunik suliaqartut isumaqarput.
- Tusagassiuutinut tapiissut pillugu nalunaarutip nutaap tusagassiuutit napaniarnerannut isumalluutaasinnaanera ima atoruminnaatsigaaq, assigiinnarlugu oqaraanni nunatsinni kiffaanngissuseqartumik tusagassiorneq pigissallugu kissaatigineqanngitsoq, siunnersorti Erik Holmsgaard allappoq.
Aaqqiissut pappialarsornarnerusoq
Naalakkersuisut siumut kalerriutigaat, tusagassiorfinnut tapiissut tusagassiornikkut suliniutinut tapiissutitut aviisinut nuna tamakkerlugu saqqummertartut Sermitsiaq aamma AG ingerlatsinerannut tapiujunnaarluni.
Siunissami tapiissutaasartup aningaasartai ikinnerulissapput, suliffeqarfiillu tamarmik Namminersorlutik Oqartussanut tusagassiornikkut suliniutiminnik aammalu aningaasatigut naatsorsuutitalimmik allaatiginnillutik qinnuteqaateqartalissapput.
Atuaruk: Tusagassiuutit assigiinngitsut qinnuteqarsinnaassapput
Taamak ineriartortitsineq tusagassiorfimmit Sermitsiaq.AG-mit isornartorsiorneqarpoq.
Tapiissutinut aaqqiissutissatut siunnersuutigineqartup Kalaallit Nunaanni tusagassiorfiit atugaannut naapertuutinngitsoq, Sulisitsisut isumaqarput.
Isorartussuseq puigoraat
- Assigiinngitsunik patsisilersugaasumik nalunaarummi tunngavissaqanngitsumik inissaqartinniarneqarput suut piunngitsut, tassami qimerlooraanni tapiissummut atatillugu pingaarnertut siunnerfiusut, taava taakku piviusorsiortumik isigalugu suujunnaarsinneqarput, tusagassiornerup siammartinneqarsinnaaneranut, naqisimaneraqarani saqqummiussisinnaanermut aammalu kiffaanngissuseqarluni isummersorsinnaanermut annertuumik kingunerlutsitsisinnaasumik – taamallu kikkut tamat oqartussaaqataanera tatineqarluni, Sulisitsisut taama oqariartuuteqarput.
Sulisitsisut assersuutigalugu tikkuartorpaa, tusagassiuutip saqqummiunneqartup atuisartunut assigiimmik periarfissiisumik pissarsiarineqartarsinnaanissaa aviisitigut suli pitsaanerpaasoq, kikkut tamarmik internetsimut attaveqartuunnginnerat peqqutigalugu. Aviisilli naqitat maani nunatsinni nassiunnerat nunanut allanut sanilliullugu akisunerujussuupput.
Politikkikkut sunnerneqarsinnaasoq
Sulisitsisut aamma tusagassiorfinnut tapiissutip pituttorsimannginneranik inuinnaallu oqartussaaqataanerat ernumassutigalugu apeqquserpaat, tassami tapiissutit pisortanit nalilersuinikkut agguaanneqartalissammata.
Atuaruk: Qallunaat tusagassiorfiisa Nivi Olsen isornartorsiorpaat
Tapiisarnermut nutaamik aaqquussutip politikkikkut sunnerneqaratarsinnaanngussaaq aammalu pappiliarsornerulersitsissalluni, naggataagut aviisit piujunnaarnissaanik kinguneqarsinnaalluni.
- Taamatut tapiisarnermut aaqqiissutip nutaap nuna tamakkerlugu misissueqqissaartumik aamma isornartorsiuisumik tusagassiornermik piujunnaarsitsinermut sunneeqataasinnaavoq, brancheudvalginit taama oqariartuuteqartoqarpoq.
Aamma atuakkit:
IA Naalakkersuisut suliaannik ajornartorsiummik nutaamik qaqilerisoq
Tusagassiorfinnut tapiissut nutaaq inissittoq