tusagassiorfinnut tapit
IA Naalakkersuisut suliaannik ajornartorsiummik nutaamik qaqilerisoq
Sooq Naalakksersuisut tassanngaannartumik inatsisilerituutigut naliliisitsinissamik nutaamik tusagassiuutinut tapit pillugit suliarititsinersut, Naaja Nathanielsenip akissutissarserusuppaa
Suliaq ajornartorsiutaasoq Naalakkersuisut nerriviata qaani saqqummersimarpasippoq.
Illuatungiliuttut siullermik aalisarnermut naalakkersuisoq, Karl-Kristian Kruse (S), tunisassiorfimmut KNT-mut 4.250 tonsinik avaleraasartoortassiinermut atatillugu isornartorsiorpaat, tassani kingusissukkut attuumassuteqarpallaarnini nalunaarutigimmagu.
Atuaruk: IA: Krusep avaleraasartoortassat imminut sullilluni agguaappai
Tusagassiuutinut tapiissutit
Inuit Ataqatigiit aningaasaqarnermut ataatsimiititaliami ilaasortaatitaasa ilaat, Naaja Nathanielsen, Naalakkersuisut tusagassiorfimmut Sermitsiaq.AG-mut tapiissutinik itigartitsineranut assortuussutaasumut apeqqutinik nutaanik qaqitsivoq.
Tusagassiorfinnut tapiissutinut allaaserisat tunngasut tamaasa uani atuakkit.
Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup tusagassiuutinut tapiissutit itigartitsissutigineqarnerinut septemberimi allaganngorlugu inatsisilerituutigut naliliisitsinissamik nutaamik suliassanngortitsillutik aalajangiinerat politikerip tupigusuutigaa.
Suliffiup iluani atugassiaq
Ukiup siuliani siulittaasup naalakkersuisoqarfia naliliinermik suliaqartitsereerpoq. Naaja Nathanielsenilu aperivoq, sooq naalakkersuisoq pineqartumut akisussaasuusoq, Nivi Olsen, misissuineq pioreersoq atuinnarsimannginneraa. Tassami naalakkersuisoq siornatigut siulittaasup naalakkersuisoqarfianut innersuussinikuuvoq, IA-mi politikerip suliaq apeqquteqarfigimmagu.
Taassumali imarisaa saqqummiunneqarsimanngilaq, Nivi Olsenip naliliineq 'suliffiup iluani takusassiatut' oqaatigimmagu.
Apeqqutit nutaat
- 2014-imi tusagassiorfinnut tapiissuteqarnermut suliassamik ingerlatsinermut paasissutissanik nutaanik suli apeqqutissaqartitsilersunik takkuttoqartuarpoq. Pisaq 2014-mi aamma 2015-mi paragraf 37 naapertorlugu arlalissuarnik apeqquteqaateqartitsivoq tusagassiutitigullu oqallisigineqarsimalluni, Naaja Nathanielsen apeqquteqarnerminut tunngavilersuivoq.
Taassuma suliami ammanerunissamut pisariaqartitsineq naqissuserpaa.
- Pisamut ataatsimut inatsisilerituutigut naliliisitsinissanik marlunnik pisariaqartitsisoqarsimanera paasiuminaatsippara. Siulittaasummi naalakkersuisoqarfianiit pigereerneqartoq qinnutigiinnaraanni naammassagaluarpoq. Nutaamilli naliliisitsisoqarneranut patsisaasinnaasunik eqqarsalersitsivoq. Nutaanik eqqarsalersitsinermiit suliap ingerlanneqarneranut ammanerunissamut piffissanngoraluarpoq, Naaja Nathanielsen Naalakkersuisunut apeqquteqarnermini erseqqissaavoq.