attuumassuteqarneq
IA: Krusep avaleraasartoortassat imminut sullilluni agguaappai
Inuit Ataqatigiinneersup Ane Hansenip, Karl-Kristian Krusep avaleraasartoortassanik aalajangiinissaq Kim Kielsenimut kingusissukkut tunniummagu isornartorsiorpaa
Naalakkersuisunut ilaasortap attuumassuteqarneranik nalornissuteqartoqartarnera unitsinneqassaaq!
Tamanna Ane Hansenip Inuit Ataqatigiinneersup naqissuserpaa, Siumumillu pineqartumi naalakkersuisuusoq, Karl-Kristian Kruse, ukioq manna avaleraasartoortassanik agguaassinera sakkortuumik isornartorsiuutigalugu.
Atuaruk: Siunnersortit: Avaleraasartoortassiineq ajunngitsumik ingerlasimavoq
Iliuuseqajaanngitsoq
Kukkunersiuisarfiup Deloittep naalakkersuisunut ilaasortap suliffeqarfiutigisimasaa KNT erneranit tiguneqartoq avaleraasartoortassanik qinnuteqarmat, arriippallaamik suliamut attuumassuteqarpallaarnini nalunaarutigigaa qanittukkut uparuareeraalu isornartorsiuineq pivoq.
Tamassuma kingorna Naalakkersuisut siulittaasuata Kim Kielsenip akisussaaffigilerpaa suliffeqarfiit sorliit pisassinneqassanersut.
Atuaruk: Kruse: Naalakkersuisuunera atornerlunngilara
Imminut sullinneq
- Isornarluinnartunut ilaavoq Aalisarnermut Naalakkersuisusoq kikkut pisassinneqartussat suliaralugit tamarmik piareermata suliami attuumassuteqarluinnassutsi Naalakkersuisut siulittaasuanut aatsaat 8. maj nalunaarutigimmagu. Imminut sullinneq ersarilluinnarpoq Aalisarnermut Naalakkersuisoq KNT-mi siulersuisuniittoq aatsaat piginneqataassutini 8 februar ilaqutariinni qanigilluinnakkaminut tunniussimallugit, piginneqatigiillu pineqartoq 19. januarimili avaleraasartoorniarnermi peqataaniarluni pisassanik qinnuteqarsimavoq. Avaleraasartorniarnermi qinnuteqartut 49-ni 15-nit akornanni pinnattuuvoq, tungavilersuutai suunersut nassuiatitaqangitsumik, Ane Hansen erseqqissaavoq.
Atuaruk: KNAPK: Avaleraasartuunik suliaq suli isornartoq
Suliap ingerlanerani allanngortoq
Suliffeqarfik aningaasarliortoq, akilereertarfimmut akiligassanik ilaatigut kinguaattooqqasimasoq, 4.250 tonsinik avaleraasartoortassanik pinnappoq. Maannalu saqqummiunneqaqqammerpoq, KNT akiliisinnaaqqasutut inissisimajunnaarsimasoq.
Ane Hansenip aamma piffissap ingerlanerani Naalakkersuisut piumasaqaatit allanngortissimammatigit isornartorsiuivoq.
- Siunniunneqarsimasut ilaat qinnuteqartut piumasaqaatinik naammassinnittut arlaqarpata makitsinikkut pisassiisoqassasoq, tamanna aamma nassuiaatitaqanngitsumik qimanneqarsimavoq. Pisassanik qinnuteqartut piumasaqaatinik naammassinnissimasut itigartitaasullu ersarissumik nassuiaanneqanngillat agguaassinermi suut tunngavigineqarsimanersut, taanna erseqqissaavoq.
Pinngitsuusoq
Naak attuumassuteqarpallaarnermut nalunaaruteqarneq kingusinneranik Deloitte isornartorsiuteqaraluarluni, annerusumik Karl-Kristian Kruse aamma Namminersorlutik Oqartussat avaleraasartuunik agguaassinermi sunniiniarsimanermut pasilliinermi pinngitsuutinneqarput.