Siulittaasoqarfik: Upernaakkut ataatsimiinneq taamaatinneqanngilaq
Inatsisartut upernaakkut ataatsimiinnissaata taamaatinneqarneranik nalunaaruteqarneq eqqortuunngilaq. Inatsisartut siulittaasoqarfia taama nalunaaruteqarpoq, Naalakkersuisullu siulittaasuata taamaatitsinermik nalunaaruteqarsimanera tupigusuutiginerarlugu. Kim Kielsen Sermitsiaq.AG-mut oqarpoq partiit siuttui tamakkerlutik ukiakkut ataatsimiinnerit aatsaat aallartinneqarnissaannik kissaateqartut.
Inatsisartut upernaakkut ataatsimiissannginnerannik oqariartuut Inatsisartuni siulittaasoqarfiup maanna illuatungilerpaa.
- Tamanna eqqunngilaq. Upernaakkut ataatsimiinneq taamaatinneqanngilaq, taamaallaalli
kinguartinneqarallarpoq, tusagassiutinut nalunaarummi, Inatsisartut Siulittaasuannit, Vivian Motzfeldtimit (S) atsiorneqartumi allassimavoq.
Siulittaasoqarfiup Inatsisartut upernaakkut ataatsimiinnissaannik kinguartitsigallarneq suli atortikkaa, nalunaarutigineqarpoq.
Kielsenip oqaaseqarnera
Tusagassiortunik pingasunngornermi aprilip aallaqqaataanni katersortitsinermi, Naalakkersuisut siulittaasuat, Kim Kielsen (S) oqarpoq upernaakkut ataatsimiittoqassanngitsoq.
- Tassa oqarsinnaavunga, Inatsisartut upernaaq manna ataatsimiissanngillat. Ullumikkut immikkut ittumik ataatsimiipput. Maannakkut ilisimanngilarput nualluut qanoq ineriartussanersoq maani nunatsinni. Taamaammat partiit siuttui tamarmik isumaqatigiillutik siulittaasoqarfimmut allaaserinikuuaat kissaatigalugu ukiamut ataatsimiinneq taanna ingerlanneqassasoq, Kim Kielsen aprilip aallaqqaataanni oqaaseqarpoq.
Taamaatinneqanngilaq - kinguartinneqarallarpoq
Inatsisartuni Siulittaasoqarfiup erseqqissarpaa ataatsimiinnissaq kinguartinneqarallartoq, taamaatitsinermillu oqariartorneq Inatsisartuni ilaasortanit paatsuungassutigineqartoq.
Inatsisartut aprilip 17-ani ataatsimiillutik aallartittussaagaluartut, maanna qaammammik ataatsimik kinguartitsisoqarsimalerpoq.
- Oqarsinnaavunga partiit tamarmiullutik nukiit pigisat nualluussuarmut akiuinermut atornissaannut atorusullugit kissaateqarmata. Ineriartorneq sapaatip akunneraniit sapaatip akunneranut, allaat akunnermiit akunnermut allanngorsinnaavoq. Taamaattumik pisariaqarpoq nukiit akiuinissamut atorsinnaanissaat, Kielsen oqarpoq nassuiaallunilu partiit siuttui Inatsisartut Siulittaasoqarfiannut aammaarlutik kaammattuummik martsip 23-ani tunniussaqarsimasut.
Kaammattuutigineqarpoq Inatsisartut Siulittaasoqarfiata kinguartitsinissamut aalajangernini allanngortissagaa, ukiamullu ataatsimiittoqarnissaa kaammaattuutigineqarluni.
Tunngavilersuutit arlallit
Kielsen nassuiaavoq Namminersorlutik Oqartussani allattoqarfiit inukisaartut. Allaffissornikkullu nukiit nappaalanersuarmut akiuinermut atorneqarnissaat taamaattumik pisariaqarluinnartoq. Coronavirus nunarsuup sinnerani sakkortuumik nappaalatitsivoq.
Kalaallit Nunaanni nappaammik tunillatsissimasut paasineqarsimasut maanna aqqaniliupput, tasmarmik Nuummiillutik.
- Naalakkersuisut tamarmik Inatsisartunut siunnersuutiminnik tunuartitsereerput. Siumut aamma tunuartitsivoq. IA siunnersuutinik aamma apuussaqanngilaq. Partiit tamarmiusut nualluussuup akiornissaanut nukitik atorusunneruaat, tamatta peqqissuunissarput pillugu, Kim Kielsen oqarpoq.
Kim Kielsenip erseqqissaatigaa Siulittaasoqarfiup aalajangerneri partiit tamarmiusut ataqqilluinnaraat. Partiilli siuttui Siulittaasoqarfiup aalajangersimanera, nappaalanersuarlu pillugu ataatsimeeqqissapput.