Inatsisartut upernaakkut ataatsimiinnissaat kinguartinneqarpoq
Inatsisartut upernaakkut ataatsimiinnissaat qaammammik ataasiugallartumik kinguartinneqassaaq
Inatsisartut upernaanerani ataatsimiinnerat apriilip 17-ani aallartinneqartussaagaluartoq kinguartinneqartoq. Coronavirus pillugu Nuummi peqqussutit pissutsillu sakkortuumik sukateriffigineqarnerat pissutaalluni taamatut aalajangerneqarpoq.
Inatsisartuni siulittaasoq Vivian Motzfeldt tusagassiutinut nalunaarummi allappoq.
- Inatsisartut Siulittaasuata partiit siulittaasui tamaasa suleqatigiissitsisullu Inatsisartunut ilaasortaatitaat ullumi ataatsimeeqatigai. Taamaalillutillu Nuummi pissutsit sukateriffigineqarnerat tunngavigalugu Inatsisartut upernaakkut ataatsimiinnissaata kinguartinneqarnissaa partiit tamarmik tamakkiisumik taperserpaat, nalunaarutigineqarpoq.
Ataatsimiititaliarmit akuerineqarpoq
Suliaq pillugu Siulittaasoqarfik ataatsimiippoq tamannalu tunngavigalugu Suleriaaseq pillugu Ataatsimiititaliamut inassutigalugu Inatsisartut upernaakkut ataatsimiinnissaat qaammammik ataasiugallartumik kinguartinneqassasoq, nalunaarutigineqarpoq.
- Taamaalillunilu Inatsisartut ataatsimiinnissaanik pilersaarutaasumik kinguartitsineq qaammatip ataatsip qaangiunnerani sivitsoqqinneqarsinnaassaaq.
- Taamatullu Suleriaaseq pillugu Ataatsimiititaliaq suliaq pillugu aamma ataatsimiippoq aammalu Inatsisartut upernaakkut ataatsimiinnissaata kinguartinneqarnissaanik Siulittaasoqarfiup inassuteqaataa Suleriaaseq pillugu Ataatsimiititaliamit isumaqatigiittumit akuerineqarpoq, Vivian Motzfeldt oqarpoq.