Kalaallit Nunaat suli atavoq - allanik tunillatsittoqarsimanngilaq

Kim Kielsenip ajuusarutigaa, Inatsisartut inatsisissamik suliaqapallattussaanerat pissutigalugu tusagassiortunik katersortitsinissap kinguartittariaqarsimanera.

Nunatsinni Nakorsaanerup Henrik L. Hansenip misissukkat 34-t akissutat Statens Serum Institutimit tigusimavai, taakkulu tamarmik ajunngillat, taamalu nutaanik tunillatsittoqarsimanani.

- Qujanartumik nutaanik tunillatsittoqarsimanngilaq. Inuit 34-t misissugassamik tigusiffigineqarsimasut akissutaat tigusimavavut. Maannalu inuti 500-t sinnillit misissorneqareerput, tamannalu naammagisimaarluinnarparput, Nunatsinni Nakorsaaneq oqarpoq.

- Aallaqqaammut nappaammut malunniutillit, taamanikkut malunniutit suut maluginiarneqassasnersut nassuiarneqarsimasut, kisiisa misissugassanik tigusiffigisaraluarpvut. Kingusinnerusukkut nassuiaatit allanngortinneqarput. Taamaammat misissueriaatsit naleqqussartariaqarsimavavut. Inuiaqatigiinni nappaatip siaruaassinnaanerata nakkutiginissaanik siunertaqarnerput attatiinnassavarput. Inuit sapaatip akunnerisa marluk kingulliit ingerlaneranni Kalaallit Nunaata avataanukarsimasut ippigisaqarpata misissorneqassapput. Piffissami sivisunerusumi ippigisaqarsimappata, ullunik 14-inik sivisunerusumik tunillaassuisinnaaneq naatsorsuutigineqarsinnaavoq, Nunatsinni Nakorsaaneq oqarpoq.

- Allat nunanut allanut angalasimanatik ippigisaqalersimasut allanullu attaveqartarsimasut tassaapput, inuit nunanit allanit takkuttunik attaveqartarsimasut. Taakku tassaapput atuartut angerlarsisut, kingusinnerusukkullu ilaquttaminnik ikinngutiminnillu peqateqartarsimasut, Nunatsinni Nakorsaaneq oqarpoq.

Allat

- Allat misissorlugit aallartitavut tassaapput, inuit aalajangersimasut nappaatip malunniutaanik ataasiakkaanik ippigisaqalersimasut. Illoqarfinni mikinerusuni inuit 20-t angullugit amerlassusillit illoqarfinni anginerusuni sapaatit akunneri tamaasa misissortarniarpavutr. Misissuinissat kingullertut taaneqartut eqqarsaatigalugit anguniagaavoq innuttaasuni tuniuuttoqarnersoq paasineqarnissaa.

- Nappaatillu malunniutigisartagai suuppat. Nalinginnaasumik nualluuteqarnermi malunniutit anersaartorfikkullu aseruuttoornerit allat, soorlu toqqusaarlunneq, napparsimasutut misigisimaneq, saannerineq, panertumik quersorneq kissarneqarnerlu. Allat aamma niaqorlussinnaapput, merianngullutik timmillutillu kiisalu allanik ippigisaqarlutik, nakorsaaneq nassuiaavoq.

- Kalaallit Nunaanni tunillatsissimasut ikittunnguummata, ippigisaqanngitsumik misissuinngilagut. Taamaallaat napparsimasut Nuummiit sineriammut nuunneqartussat misissorneqartarput, Henrik L. Hansen sineriak tamakkerlugu inunnik katillugit 146-nik misissuisoqarsimasoq, weekendimili misissuisoqarsimaneranik kisitsisaataateqannginnerminik ilisimatsititsisoq erseqqissaavoq.

- Ullunik marlunnik nikingasuuginnavippugut, taamaattoq innuttaasut 1 procentingajaat maanna misissorneqareerput.

Peqqisseqqissimasut ilaqqippat?

- Naamik, sulili peqqisseqqissimanngitsut arfineq-pingasuusut peqqissingajalerput. Tassa napparsimaruluttortaqanngilagut, Nunatsinni Nakorsaaneq oqarpoq.

- Killilimmik assartuinerit nassataannik, sapaatip akunnerini arlalinni tunillatsittoqaqqissimanngippat, nunami pissutsit misissoqqinnissaanut tunngavissaqalissaaq. Tamannali suli siusippallaarpoq. Ilisimaneqartutummi napparsimalinninngermi sapaatip akunneri marluk ingerlasinnaasarput. Taamaammat allannguinissamik eqqarsaasersortinnata minnerpaamik sapaatip akunnerini marlunni utaqqimaartariaqarpugut, Henrik L. Hansen oqarpoq.

Periarfissat allat misissorneqartut

Kim Kielsen: - Nunami assartuinerup ammaqqinneqarnissaanut periarfissanik assigiinngitsunik misissuivugut.

Sooruna inuit misissorneqarsimasut amerlassusaat nittartagassigut saqqummiunneqarneq ajortut?

- Sapinngisatsinnik sukkanerpaamik suliniarsarivugut, Nunatsinni Nakorsaaneq oqarpoq.

Kim Kielsenip ilisimatitsissutigaa, tunillatsissimasut ingerlaannaq ilisimatinneqartartut. Tamarmillu ataatsimut katersorneqareeraangata innuttaasunut nalunaarutigineqartartut, taamaalilluni akissuteqarfiginngilaa, sooq tusagassiortunik katsersortitsisoqaraangat nittartagaq aatsaat nutarterneqartarnersoq.

Upernaaru ataatsimiittoqassanngitsoq

- Upernaamut ataatsimiissanngilagut, Kim Kielsen ilimatitsivoq, Ukiakkut ataatsimiinnissaq septemberip 25-ani aallartittussatut aalajangiunneqarsimavoq.

- Coronavirusimmi atuunnerata isumaginissaanut akisussaaffeqarpugut, Kim Kielsen tunngavilersuivoq.