Portørit sulinerminnik unitsitsinissartik suli attappaat
Peqqinnissaqarfimmi pisortaqarfimmit portørit sulinerminnik unitsitsigallarnissaat akuerineqanngikkaluartoq portørit aqagu suliunnaarallassapput sulinermi atukkatik ataatsimiissutigissallugit.
Isumaqatigiissummik unioqqutitsinerussaaq Nuummi portørit aqagu tallimanngornermi sulinerminnik unitsitsigallarlutik sulinerminni atukkatik ataatsimiissutigissappatigit. Sulinermimmi unitsitsigallarneq akissarsianut sulinermullu tunngasunut isumaqatiginninniarnerit avataanni atorneqarsinnaanngilaq. Akissarsianut isumaqatiissut maanna atuuttoq 2022-mut killeqarpoq.
Peqqinnissaqarfimmi pisortaqarfik aamma sulisartut kattuffiat SIK Sermitsiaq.AG-mut taama ersarissaassuteqareerput.
Sulisitsisunit kattuffimmiillu nalunaaruteqarneq assigiikkaluartoq, taamaattoq Nuummi portørit aqagu nalunaaqutaq 10.00-14.00 ataatsimiissallutik sulinerminnik unitsitsigallarnissaminnik attassipput. Tamanna isumaqarpoq inuunerminnik navialisut portørinit taamaallaat sullinneqarsinnaasut.
- Aaqqittariaqartut pillugit pisortat qaqitsiffigisarsimagaluarpagut kinguneqanngitsumik. Assorsuaq tatisimaneqarpugut, amerlanngikkaluarluta suliassarpassuaqartuaannarpugut. Isumaqarpugut sulinermik unitsitsigallarutta aqutsisut aatsaat takussagaat qanoq suliaqartigisarnersugut. Taamaammat pilersaarutigut suli taakkuupput, Ujarak Jessen Heinrich oqarpoq.
- Tusaaneqarusuppugut, aamma takutikkusupparput suliagut qanoq annertutiginersut. Peqannginnerput malugitikkusupparput, suliarisartakkagut qanoq annertutiginersut paasiniassammatikkit, oqarpoq.
Peqqinnissaqarfiup avataani ataatsimiissasut
Akissarsianut isumaqatigiissutip maanna atuuttup iluani portørit sinniisaat suliat pillugit suleqatiminik ataatsimiigiaqqusisinnaatitaavoq. Ataatsimiinnissarli aatsaat pisinnaavoq ulluinnarni sulineq kalluarneqanngippat.
Portørilli ataatsimiinnissaminnut ilanngullugu takutikkumavaat akisussaaffiit qanoq annertutigisut amerlatigisullu portørinut ullut tamarluinnaasa tunniunneqartarnersut, Ujarak Jessen Heinrich nassuiaavoq.
Ujarak Jessen Heinrich oqaluttuarpoq sulisut sinniisaat peqatigalugu peqqinnissaqarfimmi aqutsisunik pingasunngornermi ataatsimeeqateqarsimallutik. Portørit sulinerminnik unitsitsigallarlutik ataatsimiinnissartik attammassuk, tamanna napparsimmavissuarmi pisinnaanngitsoq aqutsisut peqqusipput.
