Peqqinnissaqarfimmi aqutsisut: Sulinermik unitsitsinissaq akuerinngilarput

Portørit tallimanngorpat akunnerni sisamani suliaminnik unitsitsigallarnissamik pilersaaruteqarput. Taamaaliornermi suliassat pinartut kisimik isumagineqassallutik.

Taamaaliortoqassappalli tamanna akissarsianut isumaqatigiissutip atuuttup iluani pisussaammat, tamanna unioqqutitsinerusoq, peqqinnissaqarfimmi aqutsisut erseqqissaapput.

- Oqaatigiumasarput unaavoq, sulinermik ilumut unitsitsigallartoqassappat, tamanna alloriarneruvoq isumaqatigiissutigineqareersunik unioqqutitsineq. Taama iliorneq soorunami akuerissanngilarput, peqqinnissaqarfimmi aqutsisuni pisortaq, Joanis Erik Køtlum Sermitsiaq.AG-mut allakkatigut akissuteqarpoq.

Taanna nassuiaavoq portørit sulinerminnik unitsitsigallarnissaminnut pilersaaruteqarnerat nittartakkami Sermitsiaq.AG-mi atuaramikku, aqutsisut aatsaat susoqalerneranik ilisimasaqalersimasut.

Suliat amerlanerat oqaluuserineqassaaq

Nuummi portørit tallimanngorpat nalunaaqutaq 10.00-14.00 akornanni sulinerminnik unitsitsillutik, suliatik amerligaluttuinnartut pillugit ataatsimiissapput.

Akissarsianulli isumaqatigiissutit maanna isumaqatiginninniutigineqanngimmata, taama iliornissaq malitassanut malinninnerunngitsoq, pisortaq nassuiaavoq.

- Naatsorsuutigaarput paatsoortoqarsimassasoq, maannalu taama nalunaartoqarneranut suna tunuliaqutaanersoq paasiniarlugu, Joanis Erik Køtlum Sermitsiaq.AG-mut ilisimatitsivoq.

Isumaqatigiissutinut unioqqutitsineruvoq

Portørit kattuffiat, SIK, portørit sulinerminnik unitsitsigallarnissaannik siumoortumik ilisimatinneqarsimanngilaq. SIK-p siulittaasua Jess G. Berthelsen ilaliilluni erseqqissaavoq taama alloriarnissaq isumaqatigiissutinut atuuttunut unioqqutitsinerusoq. Portørilli sinniisaat qaqugukkulluunniit suleqatiminik ataatsimiisitsiniarluni aggersaasinnaavoq, ataatsimiinnissaq ulluinnarni sulinermut kalluaassanngippat.

- Kattuffimmi siulittaasutut pisussaavunga portørit kattuffimmut saaffiginneqqullugit, aamma sulinermik unitsitsigallaqqunagit. Uagutsinnut saaffiginnippata suliaq tigussavarput, taakkulu sinnerlugit sulisitsisunut oqaatigineqarumasut pillugit aaqqiissutaasinnaasunik ujartuilluta oqaloqateqassalluta, Jess G. Berthelsen oqarpoq.