Portørit suliatik tallimanngorpat unitsikkallassavaat
Dronning Ingridip Napparsimmavissuani portørit suliatik nalinginnaasut tallimanngorpat unitsikkallasavaat. Unitsitsigallarnissamut pissutaavoq suliat amerligaluttuinnartut pillugit ataatsimiinnissaq.
Nuummi portørit tallimanngorpat nalunaaqutaq quliniit akunnerni sisamani sivisussuseqartumik suliaminnik nalinginnaasunik unitsitsigallassapput, sulinermut tunngatillugu ataatsimiinnissaq pillugu.
Portørini suleqatigiissitanik ataqatigiissaarisoq Ujarak Jessen Heinrich aamma portørit sinniisaat Angutinnguak’ F. Knudsen tusagassiorfinnut nalunaaruteqarlutik ilisimatitsipput.
- Pinartuunngitsut suliarineqartassanngillat, tassaasut qinnguartaaviliaassassat, pilattaaviliartussat kiisalu tikittut aallartut, kiisalu nalinginnaasumik napparsimmavissuarmut napparsimmavissuarmiillu ingerlanneqartartut ingerlanneqassanngillat, Ujarak Jessen Heinrich ilisimatitsivoq.
Suliassat pinartuusut, tassa inuunermik ulorianartorsiortoqartillugu napparsimasunik aallernerit suli ingerlanneqarumaarput. Taamaattumik ambulanceni portøriusut pingasut pinasuartunik suliassaqarnissaminnut sillimasuussasut ilisimatitsissutigineqarpoq.
Suliassat annertussusaat
Nuummi portørit suliassat annertusigaluttuinnarnerat pillugu sulianik unitsitsigallarnerminni ataatsimiissapput. Innuttaasut amerlaneruleraluartut, taamatullu sullitassat amerlaneruleraluartut portørit amerleriarsimanngillat.
Portørit qulingiluat sulipput
Sinniisuusoq ilisimatitsivoq portørit pisortap saniatigut portørit arfineq-pingasut maanna sulisut. Taakku innuttaasut 18.000-it missaanniittut sullippaat, napparsimmaviup iluani sullissillutik kiisalu najukkanit allanit nakorsiartunik sullissillutik.
- Suliassagut annertoorujussuupput, uninneq ajorpugut. Suliassagut taakkartorneqartut taakkuupput ulluinnarni suliarisartakkut. Tassa suliassarpassuupput, Ujarak Jessen Heinrich pilattaavimmi ikiuutilersoq Sermitsiaq.AG-p oqaloqatigimmagu oqarpoq.
Portørit ukuninnga suliaqarput:
- Najukkanit allanit nakorsiartut mittarfimmiit aallugit mittarfimmukaallugillu.
- Napparsimmaviup iluani napparsimasut misissortiffissaannukaallugit.
- Uninngasut uninngavimmut allamut nuunnissaat isumagalugit.
- Pilattaavimmukaassinerit pilattaavimmullu aallernerit.
- Pilattaavimmi sullissinerit.
- Toqusimasunik passussineq, taamatullu ilisaasussanik oqaluffiliaassinerit.
- Pinartoqartillugu ambulancenik ingerlatsinerit.
- Tarnimikkut napparsimasut eqqissiviilliortitsilissappata sillimasuuneq.
- Eqqaavilerinerit.
Suliassat amerlassusaat:
- Ullormut agguaqatigiissillugu siniffiit 50-t nuunneqartarput
- Uninngasut pilattaaviliaanneqartussat ullormut aqqaneq-marluk ingerlanneqartarput.
- Pinartunik angallassanerit qaammammut agguaqatigiissillugu 50-it.
- Pinartuunngitsunik angallassinerit qaammammut agguaqatigiissillugit 150-it.
- Nakorsiarlutik Nuummut tikittut aallartussalluunniit ullormut 40-t ingerlanneqartarput.
- Illoqarfiup iluani najugaqartunik nakorsiartussanik aallernerit agguaqatigiissillugu ullormut 15-it.
Ujarak Jessen Heinrich ilisimatitsivoq coronap nalaani suliassat annikinnerulaartut, nappaalanersuaqarunnaarpalli maannakkumit annertuneruleqqissasut.
Portørit suliaminnik unitsitsigallarnerat siulliunngilaq. Portørit pillugit akissarsiaannik isumaqatiginninniarnerit 2019-imi unittuuimmata portørit aamma taamatulli ataatsimiissimapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...