Napparsimmavimmi sulisut suliaminnik unitsitsissasut
Dronning Ingridip Napparsimmavissuani portørit sulinerup nalaani ataatsimiinnerminni suliaminnik unitsitsissapput sulinertillu pillugu akunnerni sisamani ataatsimiissallutik.
Sulianik unitsitsinissamut pissutaavoq aningaasarsianut isumaqatigiissutinut isumaqatiginninniarnerit “uninnganerat”. Eqimattat suliaminnik unitsitsiniartut napparsimmavinni allani portørit suliaminnik unitsitsissasut.
Nalunaaqutaq 12:00 unissapput
Mailimi portørinit arfinilinnit atsiorneqarsimasumi ilisimatitsissutigineqarpoq portørit tallimanngorpat februaarip arfineq-pingajuani nalunaaqutaq 12:00 sulinerminnut tunngatillugu ataatsimiissasut, ataatsimiinnerlu akunnernik sisamanik sivisussuseqassasoq.
Suliumajunnaarnerup nalaani inuunerminnik navialisut kisiisa sullinneqassasut, portørit arfinillit ilisimatitsipput. Ataatsimiinnerullu nalaani portørit pingasut pinartoqartillugu suliaqartussatut sillimasuussapput.
Alloriarneq tulleq
- Ataatsimiinnermi sulinermi atugassarititat akissarsianullu tunngatillugu isumaqatiginninniarnerit unissimasut oqaluuserineqassapput, qanorlu uagut “alloriaqqissanersugut” oqaluuserineqassalluni, portørit ilisimatitsipput.
Portørit immikkut allagaqaamminni kaammattuutigaat napparsimmavinni allani portørit piffissami tassani aamma suliaminnik unitsitsissasut.
Akissarsiassatut neqeroorut
Akissarsiat tiimimut 0,92 koruuninik qaffanneqarnissaannik Naalakkersuisut neqeroorutigisaat naammaginngilaat. Sulinerullu nalaani ajoqusertoqarsinnaanera pissutigalugu sillimmaserneqarnissaminnik piumasaqarput, ilanngullugulu piumasaralugu sulinngiffeqarnermi angalanermut akiliutsittalernissaq.
Kingunissai
Sulianik unitsitsineq ima kinguneqassaaq:
- Nakorsiartut illoqarfinnit allaneersut tikittut aaneqarsinnaassanngillat.
- Nakorsaatit, illoqarfimmi najugaqartunut pajugutigineqartussat aggiunneqassanngillat.
- Nakorsiartut misissortinnissaminnut atatillugu immikkoortuniit immikkoortunut nuunneqarsinnaassanngillat.
- Nakorsiartut pitsorluttut namminneerlutik nakorsiarsinnaanngitsut aaneqarsinnaanngillat.
- Toqusut inaanni portørit aamma suliaqassanngillat.
Allanik iliuuseqartoqarnissaanik aarlerisaarineq
Aningaasarsiat pillugu isumaqatiginninniarnerit ingerlaqqilinngippata, sulinermut tunngatillugu portørit ataatsimiittarumaarlutik ilisimatitsipput.
Ilanngullugu ilisimatitsissutigineqarpoq portørit sinniisaasa, Ujarak Jessen Heinrichip innersuussutiginngikkaa sulisut akunnernik sisamani sulinerminnik unitsitsillutik sulinermut tunngatillugu ataatsimiinnissaq.