Politi: Sapaatip akunnerata naanera ulapaarfiuvoq
Nuna tamakkingajallugu politiit tallimanngornerup unnuaani ulapaarput. Angerlarsimaffinni aqqusinernilu eqqissiviilliornerit persuttaanerillu politiinut ulapputaasimapput. Tasiilami unnuaq eqqissisimaarfiuvoq.
Nuna tamakkerlugu politiit unnuaq ulapaarsimapput. Suliat tamarmik imigassamik atuiffiullutik.
- Ulapaarsimaqaagut. Angerlarsimaffinni aqqusinernilu eqqissiviilliornerit imminut toqunnissamik siorasaarinerit ilaatigut orniguffigisariaqartarsimavagut. Kisianni allanik annertunerusunik pisoqanngilaq, pigaartup pisortaa Mads Lynge oqaluttuarpoq.
Pisut qasserpiaanersut politiit kisitsisaatiginngilaat, qaammatip qeqqani tallimanngornerit allat sanilliullugit unnuaq ulapaarfiunerusimasoq pigaartup pisortaata erseqqissaatigaa.
- Vagtcentralimut siarnguttut amerlapput. Politiit sinerissamiittut ulapaarnerusimapput, pigaartup pisortaa oqarpoq.
Tasiilami eqqissisimaneruvoq
Tasiilami imigassamik tuniniaaneq sassaalliinerlu ilungersunartunik annertuunik pisoqareersorlu septembarip aallaqqaataani matuneqarput. Innuttaasut eqqarsarfissamik tunineqarput pinaveersaartitsinerillu maanna aallartisarneqarlutik. Tasiilami unnuaq eqqisisimaarfiusimasoq politiit oqaluttuaraat.
- Tasiilami eqqissisimaarfiuvoq. Angerlarsimaffinni ataasikkaani eqqissiviilliortoqarpoq, kisianni unnuaq tamaat isigalugu eqqissisimaarfiuvoq, pigaartup pisortaa oqaatigaa.
Imigassamik tuniniaaneq sassaallinerlu septembarip 17-ani ammaqqinneqarput. Ammaaneq sioqqullugu innuttaasut ataatsimiisinneqarput, tassanilu innuttaasut pinaveersaatitsinissamut siunnersuutinik arlalinnik siunnersuuteqarput. Politiit, peqqinnissaqarfik kommuunilu ataatsimeeqatigiisimapput pinaveersaartitsinissamullu suleqatigiisallutik isumaqatigiillutik. Arlaanilluunniit pisoqassagaluarpat ataatsimut suleqatigiinerit ingerlanneqalerumaartut aamma isumaqatigiissutigineqarluni.
