Tasiilap immikkoortortaqarfiani pisortaq: Eqqarsarfissaqartinneqarneq qujamasunnarpoq

Imigassamik tunisaqarnissamut inerteqquteqarneq atorunnaarpoq. Arlallit eqqarsarfissaqartinneqarsimaneq qujamasuutigigaat, immikkoortortaqarfimmi pisortaq oqarpoq

Tasiilami nunaqarfiinilu imigassamik tunisaqarnissamut inerteqqut arfininngorneq aallartimmat atorunnaarpoq. Inerteqqut illoqarfimmi imminnut toquttut ataasiinnaannginnera imminullu toqoriaraluartoqarnera kiisalu persuttaasoqarsimallunilu eqqissiviilliortoqarsimanera pissutigalugit atuutsinneqalersimavoq.

Politiit pigaartuisa pisortaata Brian Thomsenip nalunaarutigaam imigassamik tunisaqaqqittoqalersinnaaleraluartoq unnuaq eqqissisimasumik ingerlasimasoq.

- Ilungersunartunik pisoqarsimanngilaq, taanna oqaluttuarpoq.

Kommuneqarfik Sermersuup kangiani pisortaq Hjørdis Viberg aamma taamatut nalunaaruteqarpoq:

Diskotekip ammaqqinneqarnera nuannaarutigineqartoq

- Maannamut eqqissisimasoqarpoq. Unnuap-qeqqanut diskotek ammaqqinneqarmat inuit nuannaarput, qujanartumillu suut tamarmik eqqissisimasumik ingerlapput, taanna arfinginngornermi ualikkut Sermitsiaq.AG-mut oqaluttuarpoq.

Hjørdis Vibergip innersuussutigaa, Facebookikkut takuneqarsinnaasimasoq, inuppassuit Tasiilami imerniartarfiup unnuap-qeqqanut ammarneqarnerani imerniartarfimmut isaasut videoliarineqarsimanerat.

Immikkoortortaqarfimmi pisortap neriuutiginerarpaa, innuttaasut imigassap matoqqatinneqarnerani allatut eqqarsalersinneqarsimassasut:

- Soorunami neriuutigaarput, eqqarsarfissaqartinneqarsimaneq nammineq qanoq inuuneqarneq pillugu eqqarsaateqarnermut atorneqarsimassasoq.

- Aqqut imigassap inituallaarneranik atuuffiunngitsoq

- Inuit arlallit oqaatigigaat, imigassap matoqqatinneqarnera inuiaqatigiit pisariaqartissimagaat tusarsimavara. Aqqutip imigassap inituallaarneranik atuuffiunngitsup nassaarineqarnissaanut matoqqatitsineq eqqissisitsisimavoq, Hjørdis Viberg oqarpoq.

Immikkoortortaqarfimmi pisortap oqaatigaa, arlallit matoqqatitsisoqarsimaneranut qujamasuttut naapittarsimallugit:

- Inuppassuit qujamasussimapput. Imigassap naalagarineqalersarnera pitsaasuunngilaq. Isumaqarpunga amerlanerit tamanna nalunngikkaat. Imigassarli naalaganngoraangat suna tamarmi ajornarsisarpoq.

Powered by Labrador CMS