Sakkortuunik pisoqartaareersorlu Tasiilami imigassaarniartoqarunnaarpoq
Tasiilami imigassamik nioqquteqarneq sassaallersinnaanerlu sapaatit akunnerni marlunni matuneqassasoq, Naalakkersuisut ullumi aalajangerpaat.
Tasiilami nunaqarfiinilu imigassanik aalakoornartortalinnik niuerneq sassaalliinerlu sapaatit akunnerni marlunni matoqqatinneqassasoq Naalakkersuisut aalajangerput. Tamannaseptembarip ulluisa 17-at ilanngullugu unitsinneqarallassasoq. Tamanna Kommuneqarfik Sermersuup Naalakkersuisunut saaffiginninnerata kingorna pisoq, Namminersorlutik Oqartussat tusagassiorfinnut nalunaarutiminni ilisimatitsipput.
- Taamak aalajangerneq ilaatigut peqqinnissaqarfimmiit saaffiginnittoqarsimaneranik patsiseqarpoq. Ulluni kingullerni Tasiilami imigassartortoqarsimatillugu napparsimmavimmut unitsitaasartut pisarnermit amerlanerusimapput, taamaattoqarneralu napparsimmaviup sulineranut artukkiisimavoq malinnaaniarnerlu ajornarsimalluni, namminersorlutik oqartussat ilisimatitsipput.
Peqqinnissaqarfik artukkerneqartoq
Imigassanik aalakoornartortalinnik niuersinnaanerup sassaallersinnaanerullu matuneqarnera ingerlaannartumik atuutsilersinneqarpoq.
- Kommuneqarfik Sermersuup kissaataa Naalakkersuisut malinniarlugu aalajangerput; Naalakkersuisummi kommunip ernumassutai aamma ernumanartutut isigaat, peqqissutsimut naalakkersuisoq Kirsten Fencker oqarpoq ajornartorsiutillu aaqqiiviniarnissaanut suliniuteqarnissamut suleqataajumalluni.
Tasiilami niuertarfiit silataanni ernguttoqalersillugu niuertarfiit imigassamik nioqquteqarunnaarsinneqartarnerat Kommuneqarfik Sermersuup siusinnerusukkut iluatsilluartumik suliniutigisareerpaat.
