Imigassat tunisaajunnaarallartarnissaat iluatsilluartoq
Tasiilami pisiniarfiit silataanni ernguttoqalersillugu imigassarniarnerup matuneqarallartarneranik suliniuteqarneq atuutsilivitsinneqarpoq.
Kommuneqarfik Sermersuup majimi suliniutaa Tasiilami iluaqutaalluarpoq.
Kommuni pisiniarfinnut marluusunut isumaqatigiissuteqarsimavoq. Isumaqatigiissullu tassaavoq pisiniarfiit silataanni ernguttoqalersillugu eqqissiviilliortoqalersilluguluunniit imigassaarniarnerup matugallartarnissaa.
Eqqissiviilliortoqarunnaarpat pisiniarfiit imigassaarniaqqissinnaalertarput.
Kommuni naapertorlugu suliniutip qaammatini marlunni atuutsinneqarnerani Tasiilami pisiniarfiit silataanni ernguttoqartarsimanngilaq eqqissiviilliortitsisoqartaranilu.
- Toqqissisimanartuussaaq
- Tamanna iluatsilluarsimaqaaq. Akissarsiffimmiluunniit pisiniarfiit eqqissisimaffiusimapput, aalakoornartullu ataasiaannarluunniit matuneqartariaqarsimanngillat, Kommuneqarfik Sermersuumi Tasiilami immikkoortortami aqutsisoq, Hjørdis Viberg oqarpoq
Suliniut kommunip maanna atuuttuaannartussanngortippaa, tamannalu Hjørdis Vibergip nuannaarutigaa:
- Najukkatsinni pisiniarfiit innuttaasugullu akisussaaffimmik tigusisinnaanerminnut piareersimallutik takutivissorpaat. Pisiniarfiit atuarfimmut meeqqerivinnullu qanipput, meeqqallu amerlasuut sumiiffimmiittarput. Taamaattumik sumiiffiup kikkunnut tamanut toqqissisimaffiutinneqarnera nalunaarutaassaaq pingaarutilik, Hjørdis Viberg oqarpoq