Politi: Ilisimannittoq suli ujarparput
Aasianni toqutsisoqarsimaneranut atatillugu ilisimannittumik Kalaallit Nunaata Politiivi ujaarinnilerneranit, innuttaasut arlallit saaffiginnereersimapput.
Politiinut saaffiginnittut arlaqaraluartut, Aasianni toqutsisoqarneranut tunngatillugu paasiniaanermi ilisimannittuusinnaasoq pillugu, saaffiginninneq aalajangiisoq suli pisimanngilaq.
Kalaallit Nunaata Politiivini pigaartut pisortaat, Aqqaluk Petersen Sermitsiaq.AG-mut taama ilisimatitsivoq.
- Ilisimannittoq Aasianni KJ Greenlandimik sisamanngormat unnukkut saneqquttoq ujaarilerneranit arlallit politiinut saaffiginnipput. Ujaasinitsinnili aalajangiisumik suli saaffiginnittoqanngilaq, Aqqaluk Petersen oqaluttuarpoq.
Niviarsiaqqap aqqanilinnik ukiullip toqutaasimanera Aasianni politiit suli paasiniarpaat. Niviarsiaraq kingullermik takuneqarpoq sisamanngornermi 26. november unnukkut nalunaaqutaq 20.00 missaani, ikinngutiminukassalluni angerlarsimaffimminiit animmat.
Angut toqutsisutut pasineqarluni ulluni 27-ni tigummigallangassanngortinneqarpoq.
Paasiniaanermut tunngatillugu, angut KJ Greenland sisamanngornermi 26. november nalunaaqutaq 21.28 sanioqquttoq politiinit oqaloqatigineqarumalluni ujarneqarpoq. Angut nakkutilliissutikkut immiussakkut takuneqarpoq sisamanngornermi unnukkut sanioqquttoq, sikeriarluni apummit suunersumik tigusaqartoq ingerlaqqillunilu.
- Politiit naliliipput ilisimannittoq suliami pingaaruteqarluinnartuusoq. Angut oqaloqatigerusuttorujussuuarput, pigaartut pisortaat Aqqaluk Petersen oqarpoq.
