Aasiaat: Politiit ilisimannittumik ujaasipput
Aasianni Politiit sisamanngornermi 26. november 2020 unnukkut toqutsisoqarnermut tunngatillugu ilisimannittumik ujaasipput.
Aasianni Politiit ilisimannittumik, KJ Greenland A/S biilileriffianik sisamanngornermi 26. november 2020 nalunaaqutaq 21.28 saneqquttumik ujaasipput.
Kalaallit Nunaata Politiivi tusagassiorfinnut taama nalunaaruteqarput.
- Video-kut nakkutiginnissutit misissorneranni paasineqarpoq, ilisimannittoq KJ Greenland a/s biilileriffia nal. 21.28 (sisamanngorneq 26. november, aaqq.) saneqqukkaa. Ilisimannittoq arlaannik nunamit tigusaqartoq takuneqarsinnaavoq, nalunaarutigineqarpoq.
Ilisimannittoq ima nassuiarneqarpoq:
- Angutaavoq, taartunik naatsunik nujalik, 170-180 cm. angitigisoq, taartumik kavaajalik, aaqqateqarpoq, tungujortunik qarlippaaqarpoq qitsuup isaasaanik niutamikkut saamerlikkut atsissukkut qaammallattartunik pilerneqarsimasunik, taartunillu kamippaqarluni.
- Politiit nalililerpaat ilisimannittoq taanna paasissutissanik suliamut pingaatutilinnik nassuiaateqarsinnaasoq, politiit nalunaarput.
- Politiit ilisimannittoq taanna oqaloqatigerusuppaat immaluunniiit inuit ilisimannittup kinaaneranik ilisimannittut saaffiginnequllugit.
Suliaq pillugu saaffiginnittoqarsinnaavoq tlf.nr. 701448 atorlugu.
Niviarsiaraq aqqanilinnik ukiulik sisamanngornermi unnukkut angerlanngitsoormat tammaaneqartutut politiinut nalunaarutigineqarpoq. Tallimanngornerup unnuaani nalunaaqutaq 01.23 toqungasoq nassaarineqarpoq.
Suliamut tunngatillugu angut 27-nik ukiulik politiinit tigummigallarneqarpoq, toqutsisimasutut pasineqarluni.