Peter Olsen tatiginnikkunnaartoqareersorlu tunuarpoq
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Inatsisartuni ataatsimiinnermi marlunngornermi tatiginninnginnermik taasititsinissamik piumasaqartoqareersorlu, Naalakkersuisutut tunuarluni nalunaaruteqarpoq.
Nutaarsiassaqartitsivimmi KNR-imi tusagassiortunik kalaallisut oqaaseqartunik amigaateqartoqarnerata iluarsiivigineqarnissaa pillugu Inatsisartuni oqallinnermi, Ilinniartitaanermut, Kultureqarnermut, Timersornermut Ilageeqarnermullu Naalakkersuisumut tatiginnikkunnaarnermik taasisitsisoqarnissaanik Demokraatit piumasaqarput.
Peter Olsenimut tatiginnikkunnaarnermik taasisitsisoqarnissaanik piumasaqarneq siulliulinngilaq. Illuatungiliuttut Naleraq, Demokraatit aamma Atassut, Campus Kujalliup aningaasaqarnerata aqunneqannginnerujussua pillugu Naalakkersuisumut tatiginnikkunnaarlutik taasisitsisoqarnissaanik 16. novemner 2022 piumasaqarsimapput.
Demokraatit Inatsisartuni gruppiat Peter Olsenimut tatiginninnginnermik taasisitsisoqarnissaanik piumasaqarput. Tamassumunnga partii tunngavilersuivoq KNR-imi tusagassiortut kalaallisut oqaaseqartut amigaatigineqarneranni naalakkersuisoq akisussaaffimmik tigusisimanngitsoq.
- Demokraatiniit isumaqarpugut Ilinniartitaanermut, Kultureqarnermut, Timersornermut Ilageeqarnermullu Naalakkersuisoq akisussaaffini atuutsissimanngikkaa, siunnersuuteqarnermi tunngavilersuutigineqarpoq.
Qanoq iliuuseqassanani aalajangersimasoq
Tusagassiortut kalaallisut oqaaseqartut amigaatigineqarneranni, nunatsinni tunngavilersorluarluni tusagassiornermut kingunerluuteqarujussuartoq, Demokraatit isumaqarput.
- Pingaaruteqarluinnarpoq Naalakkersuisoq ajornartorsiummut pimoorussilluni tigusissasoq. Ilinniartitaanermut, Kultureqarnermut, Timersornermut Ilageeqarnermullu Naalakkersuisoq ajornartorsiummut qisuariaateqassanani aaliangersimavoq.
Naalakkersuisup juni 2022-mi neriorsuutigaa KNR-ip siunissaa pillugu suleqatigiissitamik pilersitsissalluni. Demokraatilli sakkortuumik isornartorsiorpaat suliami suli susoqarsimannginnera.
Taasisitsisoqanngitsoq
Demokraatit aamma isumaqarput Peter Olsen Tusagassiutilerinermik suliaqartut peqatigiiffiannut februari qaammat akissuteqarnermini, pisumi susoqarsimannginneranut tunngaveqanngitsunik utoqqatsissutiliorpoq. Taamaattoq uppernarsaarsinnaasimavaa neriorsuutigisimasaminik suleqatigiissitamik pilersitsinissamut suli qisuariaqqissimannginnini.
- Kisiannili Ilinniartitaanermut, kultureqarnermut, Timersornermut Ilageeqarnermullu Naalakkersuisoq inuiaqatigiinnut sooq qisuariaateqarsimannginnerminut tunngavilersussalluni sassarumasimanngilaq. Ilinniartitaanermut, kultureqarnermut, Timersornermut Ilageeqarnermullu Naalakkersuisoq tusagassiortuniit apersorneqarnissaminut sassarumasimanngilaq.
- Ullumikkullu kingusitsigisumik Ilinniartitaanermut, kultureqarnermut, Timersornermut Ilageeqarnermullu Naalakkersuisoq Inatsisartunut ima ataqqinninngitsigaaq, siunnersuummut akissuteqaatini immikkoortoq aallartinngilaattaa aatsaat tunniunniarsimavaa, Inatsisartut tungaanniillu oqallinnermut immersueqqinnissatsinnut killilimmik inissilluta, Demokraatit isornartorsiuipput.
Peter Olsenimik tatiginninnginnermik taasisitsinissaq tikinneqanngitsoorpoq, Naalakkersuisormi nammineerluni tunuarpoq. Tamanna Naalakkersuisut siulittaasuata Múte B. Egede Inatsisartuni oqaluttarfimmit marlunngornermi unnukkut nal. 20.00 nalunaarutigaa.