Inatsisartuni pissanganartorsiorneq: Peter Olsen sakkortuumik isornartorsiorneqarlunilu tatigineqarunnaartoq
Campus Kujallermi minnerpaamik ukiut marluk ingerlaneranni aningaasaliissutit sinnerlugit atuisoqartarsimavoq, Kukkunersiuinermullu Ataatsimiititaliamit Nunatta Karsiata naatsorsuutaanik suliaqarnermut atatillugu aningaasaqarnermik aqutsineq sakkortuumik isornartorsiuisoqarluni. Suliap malitsigisaanik naalakkersuisoq Peter P. Olsen marlunngornermi tatigineqarunnaarluni taasissutigineqarpoq.
Inatsisartut Nunatta Karsiata 2021-mut naatsorsuutai marlunngornermi suliarivaat. Kukkunersiuinermut Ataatsimiititalipa ileqquusutut naatsorsuutit misissorsimavai, isumaliutissiissummilu naalakkersuisoq Peter P. Olsen (IA) ilinniarfiit marluk aningaasaqarnerannik aqutsinermut akisussaasoq isornartorsiorlugu.
Isornartorsiut tunngavigalugu partiit illuatungiliuttut Naleraq, Demokraatit Atassullu marlunngornermi ualikkut Peter P. Olsenimut tatiginnikkunnaarlutik nalunaaruteqarput.
Isornartorsiuinermi ilungersunarnerpaatut pineqartoq Campus Kujallermut tunngassuteqarpoq. Siulersuisut siorna forstanderiusoq Henrik Ebbe Nielsen soraarnissaanik isumaqatigiissuteqarfigisimavaat, tassani tunngavilersuutigalugu suliffeqarfiup aningaasaqarneranik aqutsisinnaasimanngitsoq.
Campus Kujalleq ilaatigut Qaqortumi GUX-imik kiisalu inuussutissarsiornermik ilinniarfinnik arlalinnik takornariartitsinermillu ilinniarfimmik ingerlatsisuuvoq. Ataatsimiititaliaq isumaliutissiissummini Campus Kujalleq pillugu imatut allappoq:
- Ukiut marluk tulleriitsiinnarlugit suliffeqarfimmi annertungaatsiartumik aningaasaliissutinik sippuiffiusimavoq.
Miliuunilikkaanik amigartooruteqarnermut tunngaviusoq isumaqatigiinngissutaasoq
- Aqutsinerlunneq pillugu sakkortusisamik isornartorsiuivugut, isumaliutissiissummi allassimavoq.
2021-mut Nunatta Karsiata Naatsorsuutaanut oqaaseqaatit naapertorlugit, Campus Kujalleq 2021-mi 16,8 millioner koruuninik aningaasaliiffigineqarsimavoq, 21,4 millioner koruuninilli atuisoqarsimalluni.
- Annertunerusumik atuineq akissarsianut aningaasartuuteqarnermik annertuumik pissuteqarpoq. Taakku saniatigut illut pitsaannginnerisa malitsigisaanik aamma pequtinik pisiortornermut ilinniartut ineqarfiinut aningaasartuutit malunnartumik qaffasinneruneri, Naalakkersuisut atuinerusoqarnerusimanera pillugu allapput.
Kukkunersiuinermut Ataatsimiititaliap suliaq pillugu allakkamini oqaatigaa, sippuilluni atuisimanermut peqqutaasut pillugit isumaqatigiinngitsoqartoq paasivarput. Taakkua Naalakkersuisoqarfimmit atuarfiulluunniit tungaanit isigineqarneri assigiinngillat. Ataatsimiititaliamit tassunga atatillugu Naalakkersuisunut kaammattuutigineqarpoq atuarfiup naatsorsuutaasa iluarsineqarnissaat pillugit atuarfimmik suleqateqaqqullugit.
Ataatsimiititaliaq tamatuma saniartigut Ado Lyngep Atuarfiani missingersuutitnik malinninniarnermi ajornartorsiuteqartoqarsimanera pissutaalluni aningaasaqarnermik aqutsineq isornartorsiorneqarpoq.
Illuatungiliuttut tatiginnikkunnaartut
Suliat taakku marluk malitsigisaannik illuatungiliuttut tatiginnikkunnaarlutik nalunaaruteqarput, tassani naalakkersuisup Peter Olsenip tunuarnissaa siunertarineqarluni.
- Kukkunersiuinermut Ataatsimiititaliap isumaliuutissiissutaa atuareerlugu kialluunniit qularutigisinnaanngilaa Ilinniartitaanermut, Kultureqarnermut, Timersornermut Ilageqarnermullu Naalakkersuisup Naalakkersuisutut akisussaaffini eqqortissimanngikkaa, Naleraq, Demokraatit Atassullu nalunaaruteqarlutik allapput.
Partiit naalakkersuisooqatigiittut Siumut aamma Inuit Ataqatigiit Peter P. Olsenimut tapersersuipput, tatiginnikkunnaarnermillu taasititsinissamut pinngitsoortitsinissamut taasititsillutik. Taasititsinermi 21-t tapersiillutik taasipput arfineq-pingasullu akerliullutik taasillutik.