Ataatsimiititaliap aningaasanik aqutsinermi ajornartorsiuteqarnerit nutaat qisuariarfigeqquai
Ukioq nutaaq sioqqutilaarlugu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi naalakkersuisup Peter P. Olsenip akisussaaffigisaani aningaasanik millioninik nuussisoqartariaqarsimanera, Aningaasaqarnermut Akileraartarnermullu Ataatsimiititaliap qisuariarfigeqquai. Ajornartorsiutit assingusut pissutigalugit naalakkersuisoq ukiaq isornartorsiorneqarpoq.
Inatsisartuni Aningaasaqarnermut Akileraartarnermullu Ataatsimiititaliaq 27. decembarimi ataatsimiinnermini Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut Peter P. Olsenip (IA) naalakkersuisuuffigisaanut aningaasanik nuussisoqarnissaa aalajangiiffigaat.
Nuussisoqarneranut atuinerusimanerup atuinikinnerusimanerullu kingunerisaanik kontonit assigiinngitsunik nuussisoqartussaavoq.
Kalaallit Nunaanni ilagiinnut aningaasaliissutit 5,1 millionit koruuninik ilaneqarnerat malunnaateqarnerpaavoq, aningaasallu pikkorissartitsisarnermut aningaasaliissutit kontoanit nuunneqarput.
Ataatsimiititaliap nuussinerit akuerai, kisianni suliassaqarfimmi aningaasanik aqutsinermi ajornartorsiortoqarsimanera sakkortuumik piumasaqarfigaa, tassani aamma Kukkunersiuisarnermik ataatsimiititaliaq isornartorsiuinikuuvoq.
- Assorujussuaq ajuusaarnartoq
- Aningaasaqarnermik aqutsinermi ajornartorsiuteqarnerup nalinginnaasuusimanera paasillugu ataatsimiititaliap assorujussuaq ajuusaarnartutut isigaa.
- Aningaasaqarnermut inatsimmut tunngatillugu ukiuni tulliuttuni malunnaatilimmik suliniuteqarfigineqarluni ajornartorsiutip aaqqiivigineqarnissaa ataatsimiititaliap neriuutigaa, Aningaasaqarnermut Akileraartarnermullu Ataatsimiititaliaq allappoq.
Siunissami siusinnerusukkut missingersuutinik malitseqartitsinermi aningaasaliissutit ineriartornerisa qisuariarfigineqartarnissaat aamma naqissuserneqarpoq.
Kukkunersiuinermut Ataatsimiititaliap ukiaanerani ataatsimiittoqarnerani ilinniarfeqarfinni marlunni Peter P. Olsenip naalakkersuisuuffigisaani aningaasaqarnermi aqutsineq isornartorsiorneqarnerata kingorna, aaqqiisoqarnissaanik oqariartuuteqartoqaqqippoq.
Suliaq taanna pillugu illuatungiliuttut tatiginnikkunnaarnermik taasititsipput, Peter P. Olsenip tunuarnissaa piumasarineqarluni. Taasititsinerli naalakkersuisoqatigiinnit itigartinneqarpoq.
Naalakkersuisumik isornartorsiuineq nutaaq pillugu oqaaseqartitsinissamik Sermitsiaq.AG suliniuteqarpoq.