Illuatungiliuttut isornartorsiumminnik attassiinnartut: Peter Olsen immikkut aningaasaliissuteqartoqarnissaanik qinnuteqarsimassagaluarpoq

Partiinit illuatungiliuttunit naalakkersuisooqatigiit Peter P. Olsenimut suli tatiginninnerat tupigusuutigineqarpoq, kukkunersiuinermut ataatsimiititaliamit Campus Kujallermi miliuunilikkaanik sippuisoqartarsimanera pillugu naalakkersuisoqarfiup isumaginnissimanera sakkortuumik isorineqaraluartoq.

Illuatungiliuttunit oqaatigineqarpoq, Peter P. Olsen suliamut atatillugu nalunaarutinik arlalinnik unioqqutitsisimasoq. Taakku isumaqarput, suliaq pillugu aningaasaqarnermut ataatsimiititaliamut ilisimatitsissuteqarsimannginnami paasissutissanik Inatsisartunut tunniussisimanngitsoq.

Aamma isumaqarput ilassutitut aningaasaliissuteqartoqarnissaanik qinnuteqarsimasussaagaluartoq tassa ilinniarfimmi ukiup aappassaanik sippuilluni atuisoqarnissaa missingersuutini takuneqarsinnaalermat.

- Ukiuni arlaqartuni missingersuutinik taamak annertutigisunik sippuisarsimaneq iliuuseqarfiginngivinniarpisiuk atorfilittanillu soraarsitsiinnarlusi. Taamaattoqarsinnaanngilaq, Hans Enoksen marlunngornermi unnukkut sakkortuumik oqallittoqarnerani oqaluttarfimmit ilaatigut oqarpoq.

Peter Olsen apersorneqarusunngitsoq

Atassummit Demokraatinillu isornartorsiut taperserneqarpoq paaserusunneqarlunilu, sooq Peter Olseni ilinniartitaanermut naalakkersuisutut otte millioner koruuninik sippuisinnaaneq pillugu kukkunersiuinermut ataatsimiititaliamut akuersissummik qinnuteqarsimannginnersoq.

- Tamanna ataasiaannarluni pisimanngilaq. Sooq siorna missingersuutit syv millioner koruuninik ukiorlu manna otte millioner koruuninik sippuiffigineqarsimanerat pillugu Naalakkersuisut Inatsisartunut ilisimatitsisimanngillat, Jens-Frederik Nielsenip (D) apeqqutigaa.

Sermitsiaq.AG-mit Peter P. Olsen tamanna pillugu aamma isornartorsiutigineqartut allat pillugit apersorusunneqarsimagaluarpoq, apersorneqarusussimanngilarli. Tassunga taarsiullugu allattaata ilisimatitsissutigaa, ullumi kingusinnerusukkut tusagassiorfitsigut nalunaarummik saqqummiussisoqassasoq.

Naalakkersuisooqatigiit partiivisa Siumup IA-llu isornartorsiut isumaqatiginngilluinnarpaat. Taakkumi isumaqarput, siorna forstanderip ukullu matuma aallartinnerani rektorip soraarsinneqarnerisigut ajornartorsiut isumagineqareersimasoq, aamma ilinniartoqarfiit aningaasaqarnerannik aqutsinissamut naalakkersuisoq akisussaanngitsoq.

Isornartorsiut kukkussutaqasimasumut aaqqiissutaassasoq

Kukkunersiuinermut Ataatsimiititaliami siulittaasup Doris J. Jensenip (S) Sermitsiaq.AG-mut uppernarsarlugu oqaatigaa, kukkunersiuinermut ataatsimiititaliami suliaq misissorneqarsimasoq piumasaqaatitullu aalajangersakkat malillugit suliaq sakkortusisamik isornartorsiorneqarsimasoq.

- Kukkunersiuinermut Ataatsimiititaliap paasissutissaataani allassimavoq, Campus Kujalleq naalakkersuisorlu paatsooqatigiissimasut. Aap, ataasiaannarani kukkusoqarsimavoq, taamaammat "sakkortusisamik" isornartorsiuineq sakkortunerpaanngilaq, Doris J. Jensen nassuiaavoq, itisiliillunilu oqaatigalugu:

- Isornartorsiut pineqartoq paatsooqatigiissimanermut kukkusimanermullu aaqqiissutaassaaq, imali sakkortutiginngilaq naalakkersuisutut atuuffimmik naleqassalluni.

Amerlanerussuteqartut aalajangingaat ataqqineqartariaqartoq

Illuatungiliuttunit paasiuminaatsinneqarpoq, Doris J. Jensenip malittarisassat malinneqarsimannginnerannik aamma Ilinniartitaanermut, Kultureqarnermut, Timersornermut Ilageeqarnermullu Naalakkersusumut isornartorsiuilluni oqaaseqarluni sakkortusisamillu isornartorsiuinertalimmik isumaliutissiissummik saqqumiusseriarluni illuatungaatigut tatiginnikkunnaarnermik taasititsisoqarnissaanik itigartitsisinnaanera.

Doris j. Jenseip isorineqarnini akuersaanngilaa silatusaaqqusillunilu.

- Isornartorsiuinermi paatsooqatigiissimaneq aaqqeqquneqarpoq. Isumaqarpugut piaaraluni mianersuaalliorujussuarlunilu iliuuseqartoqarsimanngitsoq, tamannalu naalakkersuisumut toqqaannartyumik tatiginnikkunnaarnermik nassataqartariaqanngitsoq, Doris J. Jensen oqarpoq.