partii inuit
Per Rosing-Petersen Partii Inuit siulittaasortaaraat
Inatsisartuni attaviitsoq, Per Rosing-Petersen, Partii Inuit siulittaasuuffigilerlugit Inatsisartunut isertippai
Immikkut ittumik Partii Inuit ataatsimeersuarneranni Per Rosing-Petersen, maannamut Inatsisartuni attaviitsuusimasoq, partiimi nutaajukannersumi siulittaasutut qinerneqarpoq.
- Nunatta ineriartorneranut naapertuuttumik alloriaqqinnissaq pisariaqarsimavoq, tassanilu pingaaruteqarsimavoq Partii Inuit ersarinnerusumik politikkikkut akuunerulernissaa, uanilu immikkut ataatsimeersuarnermi tamanna pivoq, Per Rosing-Petersen tusagassiuutinut nalunaarummi oqarpoq.
Atuaruk: Rosing-Petersenip ammip qalipaataanik immikkoortitsinermik oqaaserisani aalajangiusimagai
Partii Inuit arfininngornermi decembarip 17-anni ataatsimeersuarput, tassanilu siulersuisunik qinersisoqarpoq.
- Nipi ersarissoq nangaanngitsoq, tunuliaqutaqaqqilerpoq. Inuiannillu kiffartuussinissarput suleqataanissarput sapinngisarput tamaat, nukigut tamaasa atorlugit alloriaqqinnermik ammaassivoq. Atugarissaarnerulernissaq siammasinnerusoq – akuunerulersitsisoq, inuiattut naleqartitagut tunngaviginerullugit sanarfissallugu alloriaqqilerpugut illillu inuk peqatiseraatsigit, Per Rosing-Petersen allappoq.
Atuaruk: Siulittaasoq: Rosing-Petersen attaviitsutut ingerlaqqissinnaavoq
Marsip 12-anni 2013-imi qinersinermi Partii Inuit 1.930-nik taaguunneqarpoq, taasisut taakku 6,4 procenteraat. Taamatut angusaqarneq Inatsisartuni marlunnik inissanik pissarsititsivoq. Qinersinerup kingorna Partii Inuit Siumut aamma Atassut naalakkersuisoqatigiinnissamut isumaqatigiissusiorput. Isumaqatigiinnermi Partii Inuit ineqarnermut, pinngortitamut avatangiisinullu naalakkersuisuutitaqalerput.
Atuaruk: Partii Naleqqamit anisitaasoq
Ukiulli taassuma ingerlanerani suleqatigiinneq taamaatinneqarpoq, uranimik pisuussutit pillugit isumaqatigiinnginneq pissutigalugu, tamatumalu kinguneranik partii naalakkersuisoqatigiinnit peersinneqarpoq.
2014-imi qinersisoqarnerani qinersisut 1,6 procentiinnaat pissarsiaralugit partii Inatsisartunut ilaasortaatitaqalinngilaq, kisianni sapaatip-akunnerata naanerani Siumumi, kingornalu Partii Naleqqami ilaasortaasimasup, Per Rosing-Petersenip, partii politikkikkut qitiusut akornannut piteqqippaa.