Politikki

Siulittaasoq: Rosing-Petersen attaviitsutut ingerlaqqissinnaavoq

Hans Enoksenip partiimi siulersuisut peqatigalugit Per Rosing-Petersen partiimit anisippaat. Kisianni sooq anisinneqarnersoq oqaluttuarerusunngilaa

Partii Naleqqami siulittaasoq, Hans Enoksen

- Soorunami Per Rosing-Petersen ulluinnarni maqaasissavara. Kisianni siulersuisut isumaqatigiissutigalugu aalajangerpaat, taanna partiitsinniikkunnaassasoq.

Partii Naleqqami siulittaasoq, Hans Enoksen, politikeri akerleriissutaasoq Per Rosing-Petersen pingasunngornermi partiimit anisitaanerata kingorna, Sermitsiaq.AG-mut taama oqarpoq.

Atuaruk: Partii Naleqqamit anisitaasoq

Suleqatigiinnissamik ajornakusoortitsineq pissutigalugu Per Rosing-Petersen ilaasortaajunnaarsinneqartoq, partiit pingasunngornermi tusagassiuutinut nalunaarummi allappoq.

Inunnut ataasiakkaanut tunngasoq
Kisianni ulluinnarni partiip allaffeqarfianut imaluunniit politikkikkut killinut tunnganersoq akissutissarsiffigiuminaappoq.

Per Rosing-Petersen qanoq suleqatigiuminaakkami?

- Tamanna oqaaseqarfiginianngilara, Hans Enoksen oqarpoq, ilaasortaajunnaarsitsinerlu inunnut ataasiakkaanut tunngasuunerarlugu.

Paarlattaanik taarsiinissaq
- Per Rosing-Petersenip nammineq aalajangissavaa, Inatsisartuni attaviitsutut ingerlaannassanerluni. Politikki qimassappagu, Inatsisartunut taartissaanik piareersimasoqarpugut, taanna oqarpoq.

Marlunngornermi partiip ataatsimiinnera, partiimi sulinermut tunngassuteqartoq, Hans Enoksenip erseqqissarpaa.

Rosing-Petersenip Sermitsiaq.AG-mut oqaatigiinnaraluarpaa, partiip qullersaqarfianit partiip aningaasaqarnera oqaluuserineqartoq.

Atuaruk: Partii Naleqqamit anisitaasoq

- Naamik, tamanna ilumuunngilaq. Ataatsimiinneq partiimi sulinerinnarmut tunngavoq, aningaasaqarnitsinni aamma ajornartorsiunngilagut, siulittaasoq Hans Enoksen oqarpoq.

- Maanna suliaq naammassivoq, partiitullu ataatsitut ingerlaqqissaagut, Hans Enoksen oqarpoq.

Atuaruk: Rosing-Petersenip ammip qalipaataanik immikkoortitsinermik oqaaserisani aalajangiusimagai

Powered by Labrador CMS