Politikki
Partii Naleqqamit anisitaasoq
Suleqatigiinniarnerup ajornakusoornera pissutigalugu Per Rosing-Petersen partiimit anisinneqarnissaa pisariaqalersimavoq, siulittaasoq Hans Enoksen oqaluttuarpoq
Marlunngornermi ualikkut Partii Naleqqap ulluinnarni aqqutsisui ataatsimiipput, tamannalu pikkunartuuvoq.
Per Rosing-Petersen marlunngornermi tusatsiakkat naapertorlugit ilaasortaajunnaarsimanersoq, Sermitsiaq.AG-p ullaap tungaani partiimeersunit arlalinnit iluatsinngitsumik uppernarsarniaraluarpaa.
Atuaruk: Rosing-Petersenip ammip qalipaataanik immikkoortitsinermik oqaaserisani aalajangiusimagai
Ilaasortaajunnaarsitaanini ilumuunnginneraraa
Pingasunngornermi ullaap tungaa partii tusagassiuutinut nalunaaruteqarpoq.
Tassanilu ersarippoq, politikeri taanna ilaasortaajunnaarsitaasoq.
Per Rosing-Petersen nammineerluni Sermitsiaq.AG-mut oqaraluarpoq, marlunngornermi ataatsimiittoqarnerani ilaasortaajunnaarsitaasimanani.
Hans Enoksenimit oqaaseqartitsinissaq suli iluatsissinnaasimanngilaq, Per Rosing-Petersenilu telefonikkut oqaaseqarpallaanngilaq.
Atuaruk: Telemi pisortaq amigartoortitsinermut pasilliutigineqarnini taamaateqquaa
Partiimit anisinneqartoq
- Suleqatigiinniarnerup ajornakusoornera tunngavigalugu ullumi siulersuisuunerit ataatsimiinnerminni aalajangerpaat: Partii Naleqqamiit Inatsisartunut ilaasortamik Per Rosing-Petersenimik suleqateqarneq tamaanga killeqassasoq, Hans Enoksen tusagassiuutinut nalunaarummi allappoq.
- Tamannalu imatut paasineqassasoq partiimut ilaasortaajunnaarneq, KNR-imi tamanna atuarneqarsinnaavoq.
KNR-imi atuaruk: Per Rosing Petersen Partii Naleqqamit ilaasortaajunnaarsinneqartoq