Nunanut allanut tunngasunut suleqatigiinnissamut periarfissaqarpasittoq

Nunanut allanut tunngasunut politikkimi Kalaallit Nunaata aamma Danmarkip akornanni oqallinneq qasukkariartorpasippoq.

Kalaallit Nunaat nunanut allanut tunngasunut politikkimi sunniuteqarnerulernissaa, danskit tungaannit qaammatini kingullerni oqariartuutigineqartarpoq.

Løkke: Matora ammavoq
Juunip qaammataani ministeriuneq Lars Løkke Rasmussen (V), mianersortumik oqariartuuteqarpoq.

- Nunanut allanut tunngasunut politikki Naalagaaffeqatigiinnerup iluani tamani ataatsimut eqqarsaatigineqarnerutillugu aamma aalajangersimanerutillugu, sunniuteqarnera annertunerussaaq, taanna Sermitsiaq.AG-mut oqarpoq.

- Tamatigut tamanna oqariartuutiginiarsarisarpara, aamma matora ammatittuaannarlugu taamaaliorusuppunga. Naalagaaffeqatigiit ataatsimiinnerisa saniatigut oqaloqatigiinnissamik ilungersuuteqartarpunga. Kalaallit Nunaannit isummani uannut apuussassaqartoqaruni, taava tikilluaqqusiuaannarpunga.

Samuelsenip nunarput iluaqutaasoq miserratiginngilaa
Kalaallit Nunaat naalagaaffeqatigiinnermi piutillugu Amerikami naalakkersuisunut attaveqarniarnermut ajornannginnerutitsisoq, nunanut allanut ministerip Anders Samuelsenip (LA) KNR-imut ammasumik kingullermik oqaatigaa.

Tamannalu tunuliaqutaralugu kalaallit isummersuutaannut inisseqartitsiniarpoq.

- Tassa sapinngisamik tamatta inissaqartinnissarput sulissutigaara. Tamannalu Kalaallit Nunaannut Kalaallit Nunaatalu qanoq inissisimarusunnera ataqqillugu suliaqarfigisarpara, taanna KNR-imut oqarpoq.

Siornatigut kajuminnginneq
Danmarkip maanna ammasumik nunarput nunanut allanut tunngasunut politikkimi nunarsuup assinganiittutut atornialermagu, nunanut allanut tunngasunut naalakkersuisup, Suka K. Frederiksenip (S) nuannaarutigaa.

- Nunanut allanut ministerip tusaaniarsimammatigut nuannaarutigaara, pitsaasutullu isigaara Danmarkip USA-mik isumaqatigiissutai pillugit danskit iluaqutissarsiviginninnerminni Kalaallit Nunaata nunarsuup assingani pingaaruteqarluinnartuunerat maanna ilungersuunneqarnerulermat, tusagassiuutinut nalunaarummi allappoq.

- Siusinnerusukkut tamatuma oqaluuserineqarnissaa taamatullu pingaaruteqassusiatalu ukkatarineqarnissaata pingaaruteqassusaa piumassuseqarfigineqarpallaarsimanngilaq, taamaattumik nunamut pitsaasussat angusassallu pillugit siumut isigisumik suleqatigiinnissarput qilanaaraarput.

Danskit naalakkersuisuisa juunimi nunanut allanut tunngasunut sillimaniarnermullu politikkimi periusissaq Issittumik ukkataqarnerusoq saqqummiuppaat. Tamatuma Nunatta tusaaneqarnerunissaanut periarfissaqartitsissasoq, Syddansk Universitetimi ph.d.-p, Jon Rahbek-Clemensenip nalilerpaa.

Ukiumoortumik Issittoq pillugu oqaloqatigiittoqartarneratigut tamanna ilaatigut pissaaq.

- Tamatigut isumaqatigiinneq ajortugut, kisianni naalagaaffeqatigiinnermut kikkut tamarmik pissarsiaqarfigisaannut ilaanermik akuersaartitsilersinnaavoq. Taamatut eqqarsarneq Nuummi aamma Københavnimi ilaatigut amigaatigaara, taanna Sermitsiaq.AG-mut oqarpoq.

Aamma atuakkit:

Nunarput tusaaneqarnissaminut periarfissagissaarnerulissaaq

Ane Hansen: Iliuuseqartariaqalerpugut