Arnanut
Kalaallit nipilersugaat saqqummersinnartut
Kalaalerpassuit ukiuni kingullerni tuluttut erinarsortalersimapput nunanilu allani nuannarineqarluarlutik.
Kalaallit nipilersugaat nunani allani nuannarineqaleriartorput.
Peand-eL, Uyarakq aamma Small Times Giants Austinimi, Texasimiittumi South by Southwestimik taasamik festivalertitsisoqarnerani nipilersortartunit nunanit asigiinngitsuneersunit 2000-nit peqataaffigineqartumi nipilersoriarlutik ukioq manna marsimi peqataapput.
Nipilersortartut tamarmik show casesinik taasani nipilersornernilu annerumaani nipilersorput iluatsitsilluarlutillu. Small Times Giantsikkut Qaqortumi umiarsuup ajunaarnera pillugu nipilersormata tusarnaartut amerlasuut qiapput. Nipilersoqatigiinni erinarsortoq Miki Jensen neriuppoq Canadami nipilersortartunik pikkorissunik immiussisitsisartup nipilersoqatigiit nipilersoriaasiat soqutigissagaa.
Kalaallit nipilersortartut nunanit avannarlerneersut peqatigalugit Nunani Avannarlerni Attaveqaammit NAPA-mit aningaasaliiffigineqarsimapput, taakkulu aappaagu aamma festivalimut peqataaqqinnissaminnik pilersaarput. Aamma kalaallit nipilersortartut soorlu Nive Nielsen and The Deer Children siornatigut festivalimi angusarissaarnikuusimapput.
Kalaallit tusaamasarsuit amigaataapput
Ilang Lumholt, ukiualuit matuma siornatigut nipilersoqatigisartakkanilu The Benefits USA-mi nuusiornissaminnut isumaqatigiissusiorput, qanittukkullu taanna kisimiilluni EP-mik Nothing, and then some-mik atsikkaminik saqqummersitseqqammerluni, aamma erinniaminik Asiami niuerfimmut Hollandimilu DJ-nut tunisisarsimalluni.
Naak kalaallit nipilersukkanik pilersitsisartut namminermisut allamiunit tusarnaarneqarsinnaasunik tuluttut erinniortalersimagaluartut kalaallit tusaamasarsuit amigaataanerat oqaatigaa, taamaattoqalerpammi aatsaat nunarput nipilersornikkut siuarsimasutut avataaniit isigineqalissammat.
- Aamma imaassinnaavoq tusaamasarsuanngortussaq nunaqarfiit ilaanni najugaqartoq. Tamanna tupinnarnavianngilaq.
Allaaserisat Arnanut aviisimi kingullermi saqqummertumi atuaruk: