Nuna ikuallattoq: Ikiuisussat ullumi tikissapput
Qatserisartut 37-t Danmarkimeersut Kangerluarsuk Tullermi ikuallattoqarneranut qamitsiniarnermut ikiuiartorlutik ullumi tikissapput
Kangerluarsuk Tullermi nunap ikiuallannerata qaminniarneqarneranut Danmarkimit ikiorneqarnissamik Naalakkersuisut qinnuiginninniarlutik sapaatiummat aalajangerput.
Ullumikkullu ullup ingerlanerani ikiusussat tikissapput.
- Upalungaarsimanermut aqutsisoqarfik qatserisartunik 37-nik aamma atortunik maanga aallartitsivoq, Kangerluarsuk Tullermi ikuallattumik qamitsiniarnermut tapersiisussanik, Upalungaarsimanermut ataatsimiititaliarsuarmi siulittaasoq, Mette Skarregaard Pedersen, Sermitsiaq.AG-mut taama oqarpoq.
Qallunaat qatserisartuinut siullermik suliassaq pingaarneq tassaavoq, ikuallattup siaruannginnissaa pinngitsoortinniarlugu ungalulersuinissaq.
Taakku 37-t ilaatigut Upalungaarsimanermut aqutsisoqarfimmi sakkutuujupput, ilaatigut kajumissutsimik suliaqartuullutik kiisalu aqutsisoqarfimmi immikkoortoqarfinni assigiinngitsunik sulisuullutik.
Qatserisartut illersornissaqarfiup timmisartuinik Herkulesiinik kiisalu illersornissaqarfiup timmisartuinik allanit timmisartuunneqassapput.
Suliaqarnerup sapaatip-akunnerinik marlunnik sivisussuseqarnissaa maanna nalilerneqarpoq.
Danskit illersornissamut ministeriaqarfiat danskit ikiuunnissaat akilerpaat.
- Kalaallit Nunaata ikioqqulluni qinnuigippatigut, ikiuinissaq tapersersuinissarlu pingaaruteqartoq isumaqarpunga, illersornissamut ministeri Trine Bramsen (Soc) taama oqarpoq.
- Naalagaaffeqatigiinnermi immikkuullarissumik atassuteqarpugut, taamaattumillu Kalaallit Nunaannit ikiorneqarnissamik qinnuiginnittoqarmat akuersaarluarpunga, taanna oqarpoq.