Kalaallit Nunaata qatserisartut kisiisa utaqqinngilai. Immikkut atortiorissaarutit qamitsiniarnermut atorneqartussat aamma utaqqineqarput, Upalungaarsimanermut ataatsimiititaliarsuarmi siulittaasoq, Mette Skarregaard Pedersen, Sermitsiaq.AG-mut taama ilisimatitsivoq.

- Ikuallattoq nunami itisuumi pivoq. Issup ikuallannerata qaminniarnera ingammik ajornakusoorpoq. Nuna paniinnarani aamma issoq silaannaqarpoq, taamaalillunilu ikuallattoq sukkasuumik annertusiartuinnarluni, Upalungaarsimanermut ataatsimiititaliarsuarmi siulittaasoq, Mette Skarregaard Pedersen, Sermitsiaq.AG-mut taama oqarpoq.

Immikkut atortussiat atorneqartussat ilaat tassaapput nunamut kappusuunneqartussat ruujorit. Taakku issumut kappunneqassapput, taamaalilluni issunut imermik kueraasoqarsinnaassalluni. Taamaaliornikkut nuna imermik immerneqassaaq, silaannarlu peerneqassalluni.

- Innerup qaavaniittup qaminnissaa pingaaruteqarpoq, kisianni ingammik aamma itisuumiittoq, taamaanngippat ikuallattoq ikummaqqissinnaammat, Mette Skarregaard Pedersen ilisimatitsivoq.

Qaammatini arlalinni ikuallaratarsinnaasoq

Upalungaarsimanermut aqutsisoqarfimmi immikkut ilisimasallit nalilerpaat, piffissaq sivikitsoq qaangiuppat ikuallattoq kuup illuanut, ikuallaffiusup avannaanut ikaarsinnaasoq.

Kuup illuatungaani nuna ikuallassinnaasoq suli issunerusutut nalilerneqarpoq, sumiiffimiillu ikuallaffiusumit annertunerulluni. Sumiiffimmi tassani ikuallattoqalissappat, ikuallattoq qaammatini arlalinni ikuallalersinnaanera, Upalungaarsimanermut aqutsisoqarfimmit nalilerneqarpoq.

Taamaattumik immikkut ittumik iliuuseqartoqarnissaa, Upalungaarsimanermut ataatsimiititaliarsuup nalilerpaa, nuna ikuallattoq aqunneqanngippat aamma killilerneqanngippat aqukkuminaallissammat.

Taamaammat Kangerluarsuk Tullermi nunap ikuallannerata qaminniarneqarnissaanut ataatsimiititaliarsuup Danmarkimi Upalungaarsimanermut aqutsisoqarfimmit ikiorsiisussanik aggersaasoqarnissaa innersuussutigaa. Innersuussutigineqartoq Naalakkersuisut malippaat.

- Sumiiffimmi illuaqqat qatsersisartut eqqumaffigisorujussuuaat, kisianni aamma ikuallattup kuup illuanut pinnginnissaa, siulittaasoq ilisimatitsivoq.

Qanimut suleqatigiinneq ingerlasoq

Suliaqartut aamma atortorissaarutit immikkut ittut Upalungaarsimanermut aqutsisoqarfimmeersut piaartumik tikinnissaat pingaaruteqartoq, taassuma oqaatiogaa.

Naalakkersuisut Danmarkimut saaffiginninnerminnit suli akissutisinngillat, kisianni Upalungaarsimanermut aqutsisoqarfik qanimut suleqatigineqalereerpoq, taakkulu suliaqarnissamik piareersaaleruttorput.

- Suliaqartut aamma immikkut atortorissaarutit kingusinnerpaamik pingasunngorpat nassiunneqarnissaat neriuutigaarput. Kommunimi upalungaarsimasut annertuumik sivisuumillu suliaqarput, taakkulu nersugassaapput, Upalungaarsimanermut ataatsimiititaliarsuarmi siulittaasoq, Mette Skarregaard Pedersen taama oqarpoq.