isumaqatigiissutit
Akerliusut Knud Kristiansen oqaloqatigerusuppaat
Kujataani akerliusut angallannermi kiffartuussinissamut isumaqatigiissutit nutaat qiimmatsaatiginngilaat
Kujataani eqimattat akerliusut maanna attaveqarnermut naalakkersuisoq, Knud Kristiansen (A), allakkanik ammasunik 'Naammaleqaaq! Naammagittarnerput tamaanga killeqarpoq!' qulequtaqartumik allagaqarfigalugu oqaloqatiginiarsaraat.
Najukkami akerliuneq
Taakku eqimattat naqissuserpaat, ukiumit nutaamit angallannermut aaqqiissut akuerisinnaanngilluinnarlugu, tamatuma kingunerissavaa angallammik angallassinerulineq, qulimiguulimmik tapilerlugu, ullumikkut kiffartuussinermik isumaqatigiissutip qulimiguulimmik angallassineq ingerlappaa.
Nammineq akiliisassasut
Allannguutit ilagaat, ilaasut siunissami kinguaattoorlutik angallammik apuutinngitsoorsimagunik nerisaqarnertik unnuinertillu nammineq akilertalernissaa aammalu Air Greenlandimut bilitsertik annaasalernissaat.
Tamanna januaarip aallaqqaataanit angalatitsiviit sumiiffimmi angallassilernissaannik pissuteqarpoq, Disko Line aamma Air Greenland, taakku illuatungimi ilaasuinut pisussaaffilersugaanngillat.
Sallusoq
- Angallannermut naalakkersuisoq, kujataamiuusugut imaatigut angalanerunissarput nammineq kissaatigisimagipput oqarami salluvoq, kinami sikorsuaqarfiusartumi sikusartunillu kangerluppassuaqarfiusumi inuusoq kissaateqassammat imaatigut angalanerorusussalluni, akerliusut aperipput, taakku tassapput Monica Dorph, Stine Egede aamma Jim Riis.
Taakku aamma kiffartuussinissamut isumaqatigiissummut kujataamiut angallammik angalasalernissaanut tapersersuisoqarneranik uppernarsaammik saqqummiussisoqarnissaanik kissaateqarput.
Atuaruk: Ilaasut timmisartorlutillu umiarsuartassapput
Atorunnaarsissigit
- Piumasaraarput atsigugarsi atorunnaarsissagissi! Piumasaraarput tusarniaqqaarluta nutaamikilusilersuissasusi! Piumasaraarput ullumikkumit ajornerunngitsumik siunissami angallannikkut atugaqartitaassalluta qulakkeerneqassasoq, taakku Naalakkersuisunut ilaasortaq ataatsimeeqatigissallugu qilanaaraat.
Atuaruk: Knud Kristiansenip ilaasunut ingerlaqqissinnaanngitsunut aaqqiissummut ammaassivoq