kiffartuussinissat

Ilaasut timmisartorlutillu umiarsuartassapput

Kiffartuussinissamut isumaqatigiissutit nutaat ilaasunut ajorsartitsissanngitsut, partiit naalakkersuisoqatigiit naqissuserpaat

Qeqertarsuup Tunuani, Nunatta Qeqqani aamma Kujataani pisortanit taperserneqartunit angallassisunit angalasut, Kalaallit Nunaat imaatigut takunerusalissavaat - silap apeqqutaatillugu.

Qeqertarsuup Tunuani aasaanerani ullumikkut umiarsuarnik pisarpoq, tamannalu aaqqiissut annertuumik annertusarneqalerpoq, maanna qulimiguulimmik angalaneq taakkunani atorneqarnerugaluarpoq.

Atuaruk: Kiffartuussinissamut isumaqatigiissutit maanna inissipput

Qulimiguulinnik attartortassasut
Umiarsuaateqarfik Disko Line, sumiiffinni taakkunani kiffartuussinissamut isumaqatigiissuteqartuusoq, pisariaqartillugu qulimiguulinnik attartortarniarpoq. Aasaanerani aalajangersimasumik minnerpaamik qulimiguulik ataaseq attartorneqartassaaq, ukiuuneranilu marluusassapput.

Tamanna isumaqatigiissutini saqqummiunneqartuni atuarneqarsinnaavoq, taakku ukioq nutaami 2021 ilanngullugu atuutissapput.

Isumaqatigiissutit pitsaasut
Isumaqatigiissutit nuannaarutigalugit naalakkersuisoqatigiit naqissuserpaat.

Naalakkersuisooqatigiit ukiarmi 2015-imiit aallartittumik itisilernagit atuagassat najoqqutaralugit Naalakkersuisut peqatigalugit, oqallilluareerlutik, apeqquteqaateqareerlutik aammalu akissutissarsereerlutik, maanna kiisami akuerisimavaat.

Aningaasartuutissat iluanniittut
Siullermik naalakkersuisoqatigiit nuannaarutigaat, suliaq ataatsimut isigalugu iluatsilluartumik naammassineqalermat, tassami aningaasartuutissatut atugassarititaasut iluanni sullissisoqarsinnaanngormat.

Kiisalu ‘taamaalilluni angallassinermi akiusut annertuumik qaffaavigineqarpallaaratik inissimmata, sullissinikkut annertuumik appariartuutaanngitsumik aammalu angallassinikkut ataqatigiissumik aaqqissuisoqarsinnaanngornera qulakkeerneqarmat', illuatungeriit taama oqaatiginnipput.

Ernumasut
- Naalakkersuisoqatigiinni partiit eqqasuutigaat illuatungeriit iluminni attaveqaqatigiinnerat, tassalumi immakkut silaannakkullu paarlaattoqaraangat Kujallermi Avannaanilu pisartut eqqarsaatigalugit, partiit erseqqissaapput.

- Uagut isumaqarpugut silaannakkut immakkullu angallassineq pillugu sullissinermi Kujallermi Avannaanilu isumaqatigiissutit ersariffaarissumik sullissineq ajorneruleqqunagu qulakkeerisoqartariaqartoq. Tamanna iluatsinniarsinnaavoq suliffeqarfiit sullissinissamik neqeroortut akunnerminni, attaveqaqatigiinneq pitsaasoq atorpassuk.

Naalakkersuisoqatigiit erseqqissarpaat, Nunatta immikkoortuani Kujallermi massakkut sullissinermi Avannaanisut aaqqissuisoqarluni allannguisoqarpat ilaasunut akornutaalertariaqanngitsoq - tassani partiit ilisimavaat, avannaani ilaasut ajornartorsiutigisarsimagaat unnuinissartik nammineq akilertussanngortaramikku angallatit timmisartullu akornanni kinguartoortoqaraangat.

Sunniuteqassanngitsut
- Ilaasut soorunami kinguaattoortarnerit akisussaaffiginngilaat, tamatumanilu ilaasut qaqugumulluunniit pisinnaatitaaffitik ilisimasariaqarpaat, ilaasullu sullinneqarnerat suna tamaat qulakkeerlugu aaqqissuunneqartariqarpoq, ilaasut kinguaattunnginnissaat pinaveersaarlugu aammalu pisariaqanngitsumik annertuumillu akiligassarsisinnaannginnissaat pinaveersaartariaqarluni, partiit erseqqissaapput.

Partiit naalakkersuisoqatigiit aamma Naalakkersuisut kajumissaarpaat, sullissinermut isumaqatigiissutissanik suliat aallartiaartassasut minnerpaamik ukiup aappaata qeqqa imaluunniit ukiunik marlunnik sioqqutilluni, taamaalilluni Aningaasaqarnermut ataatsimiititaliap aammalu soqutigisaqaqatigiit allat piffissaqarluarlutik allassimasussanik misissuilluarlutik oqallilluarnissaat angujumallugu.

Kiffartuussinissamut isumaqatigiissutit pillugit allaaserisat tamaasa uani atuakkit

Powered by Labrador CMS