Knud Kristiansenip ilaasunut ingerlaqqissinnaanngitsunut aaqqiissummut ammaassivoq

Namminersorlutik Oqartussat tungaannit saqqummiussinermit siullermit, angallannermut kiffartuussinissamut isumaqatigiissutit angalanermik pitsaanerujussuarmik kinguneqassapput.

Illoqarfiit akornanni suli timmisartuussineq
Attaveqarnermut naalakkersuisup, Knud Kristiansenip (A), tusagassiuutinut nalunaarummi oqaatigaa, isumaqatigiissutit nutaat Disko Linep Kujataani annertuumik sullississutigiligassai - arlalinnik iluaqutissartaqartut:

• Kujataani illoqarfiit tamarmik akornanni timmisartumik immakkullu assartuisoqartassaaq – ukioq tamaat

• Angalasut suna atorlugu illoqarfiit akornanni angalarusunnerlutik namminneq aalajangertassavaat. Timmisartoq angallalluunniit atorlugu. Silap ajornera pissutigalugu angalasoqarsinnaanngippat, aappaanilli angalasoqarsinnaalluni, timmisartumut angallammulluunniit ilaasoq ingerlaannaq inniminniissunneqassaaq.

• Kujataani nunaqarfinnut nunaqarfinniilluunnit immakkut angallassineq. Immakkut angallassisoqarsinnaanngippat helikopteri atorneqassaaq.

Aningaasanut sinaakkutit assingi
Aamma pingaartinneqarpoq, isumaqatigiissutit aningaasatigut atugassat Aningaasanut inatsimmi immikkoortinneqartut Naalakkersuisunullu pisinnaatitsissutigineqartut iluanni isumaqatigiinniutigineqarnissaat pingaarnikuusoq.

Meeqqanut soraarnernullu bilitsinut akikillilerutit qulakkeerneqarnissaat aamma pingaartinneqarpoq, taanna immikkut ittumik aningaasanut inatsimmi aningaaliissuteqarfigineqarpoq, Aningaasaqarnermut Akileraartarnermullu Ataatsimiititaliamit akuerineqartumik.

Atuaruk: Ilaasut timmisartorlutillu umiarsuartassapput

Marloqiusamik angallanneq
- Aaqqiissutissani toqqarneqartuni angallannermik aaqqissuussineq ullumikkutut patajaatsigisoq ingerlatsinermilu isumannaatsigisoq atuutilersinneqarpoq. Nunatta immikkoortuisa ilaanni, tassunga ilanngullugu Kujataani, pissutsit pitsanngortinneqarput – tassunga ilanngullugit pingaartumik sila pissutigalugu angallannerit akuttussusaat, Knud Kristiansen tusagassiuutinut nalunaarummi oqarpoq.

- Tamanna pivoq marloqiusamik angallannermi aaqqissuussinerup atuutilersinneqarnera pissutigalugu, tassani suli pissutigalugu pilersaarutigineqartutut angallassisoqarsinnaanngippat Diskoline allatut iliuusissamik neqerooruteqarluni.

- Tassa ataatsimut isigalugu imaappoq, siunissami marloqiusamik angallassisarnermi ullumikkornit helikopterimik assartuisarnissamik neqerooruteqarfiusumit akulikinnerusunik angalasoqarsinnaassaaq.

Atuaruk: Kommune Kujalliup kiffartuussinissamut isumaqatigiissut dumpertippaa

Akit arlallit
Ingerlatsisut bilitsinik tuniniaasassapput, taamaalilluni qulimiguulimmik assartuineq akisunerussalluni bilitsit ullumikkutut akeqassallutik, angallatit sukkasuut akikinnerupput angallatillu arriitsut akikinnerpaajullutik. Angalanissaq ullumikkornit akikinnerulersinniarlugu angalasut arlalinnik qinigassaqarput.

Qeqertarsuup Tunuani aaqqissuussineq ilisimaneqartoq ingerlatiinnarneqassaaq. Ingerlatsisup ilisimatitsisutiginikuuaa timmisartumik angallasseriaatsip timmisartuussivissatullu pilersaarut maannakkut atuuttoq ingerlatiinnarneqassasoq.

Timmisartumik angallassineq
Taamaalilluni angallassinissamut pilersaarut Air Greenlandip ullumikkut atugaa taannarluinnaq atorlugu timmisartumik angallassisoqartassaaq. Sila pissutigalugu angallammik angalasoqarsinnaanngippat sikoqarneraniluunniit angallamik angalasoqartassanngilaq.

Taamaattoqartillugu helikopteri atorlugu ullumikkutut angallassisoqartassaaq. Tamassuma saniatigut angalasoqarluartillugu angallatini inissat amerlineqartassapput – assersuutigalugu juullimi ukiortaamilu.

Atuaruk: Kujataani kiffartuussinissamut isumaqatigiissut aalassatsitsisoq

Maanna nammineq akiliisalissasut
Knud Kristiansenilli nassuerutigaa, Kujataani ilaasut ajornerusumik inissinneqartut, tassami ukioq nutaamit assersuutigalugu silap ajornera pissutigalugu kinguaattoorlutik timmisartoq angumerinngitsoorunikku, nerisaqarneq unnuinerlu nammineq akilertalissavaat.

- Ilimagineqartariaporli ingerlatsisut amerlanerpaat ilaasut apuuffissaminnut apuunnissaannik pisinnaasartik malillugu ikiuuttassasut. Aammattaaq ilimagineqartariaqarpoq ingerlatsisut akunnerminni annertunerpaamik ataqatigiissaarinissamut kajumissuseqassasut, Knud Kristiansen erseqqissaavoq.

- Tamassuma saniatigut erseqqissassallugu pingaaruteqarpoq ilimagineqartoq taamaatitsiinnartarnerit kinguaattoornerillu angallatit helikopterilu atorlugit kiffartuussinermi marloqiusamik aaqqissuussinerup atuutilersinneqarnerata kingunerisaanik annertuumik ikileriassasut.

Tamatuma saniatigut ilaasut ajunnginnerusumik inissinneqarnissaat ammaappaa.

- Paasinarsissapput angalanissanut inissaqarnissanullu qulaakkeerisoqarsinnaannginnera pissutigalugu unammilligassaqartoq qulakkeerinnittarnermik sillimmasiisarnermilluunniit periuseq atuutilersinneqarsinnaassaaq. Taamaattoqarpat taamatut aningaasalersuinissaq isummerfigineqassaaq, taanna oqarpoq.

- Tassunga atatillugu qulakkeerinninneq angalasunut tamanut atuutissanersoq imaluunniit assersuutigalugu nunap karsianit takornarissanillu akilerneqartut atuutissannginnersut isummerfigineqassaaq. Isumaqatigiissutip aallartinnginnerani misissueqqissaarneq Naalakkersuit allartissavaat, naalakkersuisunut ilaasortaq oqarpoq.