Skip to main content

NIIK: Naqinnernik ilisarinnissinnaanngitsunut misiliut naammassiniarli

Nunatsinni Inuit Innarluutillit peqatigiiffiisa Kattuffiat isumaqarpoq naqinnernik ilisarinnissinnaanngitsut pillugit kommunit akisussaaffimmik annertunerusumik tigusisariaqartut.

Naqinnernik ilisarinnissinnaanngitsunut kalaallisut misiliuteqalernissamut nukiit tamaasa atorneqartariaqarput. Nunatsinni inuit innarluutillit kattuffiat misiliuteqalernissamut tapersersuilluni taama nalunaaruteqarpoq.

Kattuffiup erseqqissarpaa naqinnernik ilisarinnissinnaanngitsuuneq nappaataanngitsoq, taamaattorli innarluutaasoq, naatsorsuutigineqartorlu innuttaasut 10 procentiisa tungaannut taama innarluuteqartut.

- Naqinnernik ilisarinnissinnaannginneq pillugu piffissami kingullermi tusagassiuutitigut sammineqartup ersersippaa innarluuteqarneq eqqartussallugu qanoq tunuarsimaarfigineqartigisoq ajoraluartumillu aamma pisortat akisussaaffimminnik kivitsiniartarnerminnut qanoq oqimaarsartiginerat, NIIK-mi siulittaasoq, Anders Meilvang, tusagassiutinut nalunaaruteqarluni allappoq.

LÆS OGSÅ: Ane Lone Bagger: Naqinnernik ilisarinnissinnaanngitsunut misiliut suliarineqarpoq

- Taamaattumik nuannaarutigeqaarput inuit Aviâja Paviassenitut atugaqartut saqqummerlutik naqinnernik ilisarinnissinnaannginneq pillugu oqaluttuarsinnaammata. Taassumalu tunuarsimaarfiginngilaa eqqortumik oqaasertaliissalluni, tassalu naqinnernik ilisarinnissinnaannginneq tassaasoq innarluut, Anders Meilvang oqarpoq.

Kommunip akisussaaffii

Kattuffiit siulittaasuata erseqqissaatigaa inuit innarluutillit tapersersorneqarnissaanut aqqutissiuunnissaannullu kommunit aamma akisussaaffeqartut. Tapersersorneqarneq pitsaasuuppat inuit naqinnernik ilisarinnissinnaanngitsut ilinniakkaminnik naammassinnissinnaapput, inuiaqatigiinnut iluaqutaasussanngorlutik, erseqqissarneqarpoq.

- Aviâja Paviassen oqaluttuarpoq pisariaqartitaminik ikorfartorneqarani
ikiorserneqaranilu. Ajoraluartumillu tassa imaappoq inuit innarluutillit
ikiorserneqarnissaminnut inatsisitsigut pisinnaatitaaffii tamatigut
tunniunneqartaratik, NIIK tusagassiutinut nalunaarummini allappoq.

LÆS OGSÅ: Naqinnernik ilisarinnissinnaanngitsoq: Ikiornissaqanngilaq

Naqinnernik ilisarinnissinnaanngitsunut misiliutip suliarineqarnera, taamatullu ukiukinnermit paasineqajaarnissap periarfissaalernissaa, Anders Meilvangip tapersersorpaa:

- Atuarniarnikkut sanngiitsumik inissisimasut 2.-3. klassiunerannili misilinneqartarnissaat, tamatumalu kingorna ikiuutit tapersersuinerlu pisariaqartoq inississallugit aalajangiisuulluinnarsinnaavoq. Meeqqat naqinnernik ilisarinnissinnaannginnerat uppernarsineqarmat taakkununnga angajoqqaajusut meeqqaminnik tapersersuinissaannut sakkussaannik tunineqarnissaat taamatulli pingaaruteqartigivoq, oqarpoq.

- Imaassinnaanngilaq inuit innarluutillit taakkuluunniit ilaqutaat inuit innarluutillit inatsisitigut pisinnaatitaaffiisa atuuttussanngortinneranni pisortanut illuatungiliuttunngortinneqartassasut. Kommuneni politikkikkut akisussaasut qinnuigaagut akisussaaffimminnik kivitsinissaannut, taamaasilluni inuit innarluutillit ilinniagaqarnermik angusaqarsinnaaqqullugit taamaasillutik allatuulli inuunissamut periarfissinneqarlutik. Kommunet akisussaaffimminnik kivitsisinnaanngippata taava suliassamik arsaarneqartariaqarput, Anders Meilvang naggasiivoq.​​​​​

LÆS OGSÅ: Kalaallit Nunaanni naqinnernik ilisarinnissinnaannginnermut misiliuteqanngilaq
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER