Skip to main content

Kalaallit Nunaanni naqinnernik ilisarinnissinnaannginnermut misiliuteqanngilaq

Kalaallit Nunaanni pissutsinut oqaatsinulluunniit tulluarsakkamik naqinnernik ilisarinnissinnaannginnermut misiliuteqanngilaq. Misiliut meeqqat unammillernartumik inissisimasut tapersersornissaannut periarfissiissagaluarpoq, Misi Sermersuumi siunnersuisut pisortaat, Laila Skydsbjerg Skytte oqarpoq.

Kaalalilt Nnuannai naqinenik iliasrinisiaanaagnisutnut msiilituqeartoaqgnnilaq.

Oqaaseqatigiit siulliit amerlasuunit tukattutut isigineqarsinnaassagunarput. Naqinnernilli ilisarinnissinnaanngitsunut oqaatsit takisuut taamatulli atuaruminaassinnaasarput, tusaaniarnarsinnaallutik allaallu paasinanngivissinnaallutik.

Meeqqalli inersimasullu qassit naqinnernik ilisarinnissinnaanngitsuunersut ilisimaneqanngilaq:

- Kalaallit Nunaanni naqinnernik ilisarinnissinnaanngitsut paasiniarlugit misiliuteqanngilaq, Kalaallit Nunaanni pissutsinut oqaatsinullu tulluarsarneqarsimasumik. Misi Sermersooq meeraq atuarniarnermut allanniarnermullu unammilligassaqartoq pillugu saaffigineqaraangami, Misi Sermersooq atuarfilluunniit misilitsitsinissaminut neqerooruteqarsinnaanngilaq, Misi Sermersuumi siunnersuisartut pisortaat Laila Skydsbjerg Skytte Sermitsiaq.AG-mut oqaluttuarpoq.

- Assigiinngitsorpassuit aamma eqqumaffigineqartariaqarput, imaassinnaammat meeraq naqinnernik ilisarinnissinnaasoq, ilikkarniarnissaminulli allatigut unammilligassaqartoq, erseqqissaavoq.

Misi Sermersuup angajoqqaat, perorsaasut ilinniartitsisullu meeqqat 0-18-inik ukiullit pillugit siunnersortarpai. Ajornartorsiutit perorsaanermut eqqarsartaatsimullu tunngasuusinnaapput, meeqqap ineriartorneranut, atugaanut ilikkariartorneranullu tunngasuusinnaallutik. 

Misiliut pisariaqartoq

Kalaallit Nunaanni naqinnernik ilisarinnissinnannginnermut Kalaallit Nunaat misilitsissuteqanngitsoq, Sermitsiaq.AG-p 2011-imi allaasereqqaarpaa. Suliami politikkikkut oqallittoqarpoq suliniuteqartoqarlunili. Maannamulli misiliummik suli naammassinnittoqanngilaq.

Laila Skydsbjerg Skytte naqinnernik ilisarinnissinnaannginnermut misiliut nunatsinnut oqaatsitsinnullu tulluarsarneqarsimasoq tikilluaqquaa.

Ilinniartitaanermut aqutsisoqarfiup atuartunut misiliutissat suliarai, atuartut naqinninnernik ilisarinnissinnaanngitsutut ernumanarsinnaasut paasinissaat  siunertaralugu, taamatullu ilinniartitsinermi isumassarsiorfiusinnaasunik suliaqarluni.

- Neriuppunga meeqqat ineriartornerat pillugu siunnersuinitsinni atorsinnaasatsinnik pissaqalissalluta, Laila Skydsbjerg Skytte oqarpoq.

Misiliutissatut atortussaq paragraf 37 atorlugu Inatsisartunit taamani ilaasortaasimasumut Suka K. Frederiksenimut (S), augustimi 2015-imi akissutigineqarpoq. 

- Ilinniartitaanermut Aqutsisoqarfik atuarsinnaanermut misiligummik ineriartortitsiniarpoq, taakkulu Kalaallit Nunaanni atuarniarnermikkut allanniarnermikkullu ajornartorsiutilinnik paasiniaanermut atorneqartassapput, allassimavoq.

- Misiliutinik atuartitsissutinillu ineriartortitsineq 2016-imi naammassineqassasoq aqutsisoqarfimmit naatsorsuutigineqarpoq, piffissami tassani ilinniartitaanermut naalakkersuisuusoq, Nivi Olsen (D) taama akissuteqarpoq.

Misiliulli piffissaq eqqorlugu naammassisimarpasinngilaq. Paragraf 37 atorlugu apeqqummut Inatsisartuni ilaasortamut Mikivsuk Thomassenimut (IA) akissummi oktober 2018-imi suliarineqarsimasumi atuarneqarsinnaavoq "llinniartitaanermut Aqutsisoqarfiup 1.-3. klassini atuartunut misiliutissat suliarinerat ingerlakkaa, atuartut naqinninnernik ilisarinnissinnaanngitsutut ernumanarsinnaasut paasinissaat siunertaralugu”. Ilinniartitaanermut Naalakkersuisumit Ane Lone Baggerimit ilanngullugu akissutigineqarpoq llinniartitaanermut Aqutsisoqarfiup ilimagigaa eqimattanik misiliutit inerisarnerat 2019-imi naammassissasoq, atuartunullu ataasiakkaanut misiliutit 2020-mi naammassissasut.

Misissuinerit taakku piffissaq eqqorlugu ingerlanersut suli paasinarsinngilaq. Ilinniartitaanermulli Aqutsisoqarfimmit suliaq pillugu ukiamut ilisimatitsinerunissaa Misi Sermersuumit qilanaarineqarpoq.

- Ilisimavara misiliutissamik suliaqarneq ukiuni arlalinni suliarineqarsimasoq, oqaatsigulli immikkuullarilluinnarmata tamanna paasinarpoq. Danmarkimi Ilinniartitaanermut ministeriap naqinnernik ilisarinnissinnaannginnermut misiliutaa atorsinnaasimanngilarput oqaatsigut allaanerulluinnarmata. Misiliut qallunaatuumit kalaallisut nuutsiallaannarneqarsinnaanngilaq.

- Taammammat uagut sulisutut atortussaqarnissarput pingaaruteqarpoq, atuartut naqinnernik ilisarinnissinnaanngitsutut ernumagineqartut paasisinnaaniassagatsigit, ineriartornerannilu siunnersuisinnaaniassagatta, Laila Skydsbjerg Skytte oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER