Motzfeldt mattusimanissaq pillugu: Malitassat sukannernerusut qinikkanut tamanut atuupput
Bentiaraq Bendtsen Ottosenip Danmarkimit tikinnerminit ullut 14-it qaangiunneranit ukiaanerani ataatsimiinnermi peqataalersinnaanini mamiagaa. Malitassalli Inatsisartunut tamanut atuupput, Inatsisartut siulittaasuat nassuiaavoq.
Bentiaraq Bendtsen Ottosen Danmarkimiit Nuummut sisamanngornermi tikippoq. Tikinnermini Inatsisartut Siulittaasoqarfianit ilisimatinneqarpoq 12. november aatsaat Inatsisartoqarfimmut isersinnaalerumaartoq. Tikinnerminit ataatsimiiffiusut ullut arfinillit taamaasilluni peqataaffigissanngilai.
- Aalajangerneq siulittaasoqarfimmit tamanit, partiit akimorlugit, Nakorsaanermiillu siunnersorneqarneq aallaavigalugu, aalajangerneqarpoq, Inatsisartuni siulittaasoq oqarpoq.
- Malittarisassat sukannersut Inatsisartuni ilaasortanut tamanut atuupput, Vivian Motzfeldt Sermitsiaq.AG-mut erseqqissaavoq.
Inatsisartut ataatsimiinnerat unitsinneqartariaqarsimavoq, Aningaasaqarnermut Ataatsimiititaliaq tunillatsissimasumut qanigisaasumik ataatsimeeqateqarsimallutik angerlarsimaffimminni mattusimagallartussanngornerat pissutigalugu. Unittooqqinnginnissarlu pillugu Inatsisartut sukannersunik maanna malittarisassaqarput.
Ataatsimiinneq ingerlaannassaaq
Inatsisartuni Siulittaasoq, Vivian Motzfeldt, nassuiaavoq Inatsisartut ukiaq manna aalajangiiffigisassaat arlallit pingaaruteqarluinnartut. Taakkununnga assersuutigaa aningaasanut inatsit, coronap kingunerinut sunnerneqartorujussuaq, Inatsisartunit novemberimi akuerineqartussaq.
- Tunillatsittooratarsinnaaneq pissutigalugu Inatsisartut ataatsimiinnerata unitseqqittariaqalernissaa pinaveersaartikkusupparput. Sulinitsinni ulapittorujussuuvugut, immitsinnut qanittuaraalluta sulisarpugut, ataatsimiinnernilu inersuarmiuppat ataatsimiititalianiuppat, immitsinnut qanittuaraasarluta. Ilaasortat ilaat tunillatsissimappat, tuniluunneq sukkasoorujuussaaq. Taamaammat ilaasortat tamarmik sukannersumik maleruaqqusanut malinneqquneqarput, Vivian Motzfeldt oqarpoq.
- Danmarkimi Europamilu tunillaassorneq annertooq takuarput, tamanna uagutsinnut imaannaanngitsumik inissitsitsivoq, oqarpoq.
Misissorneqareeruni anisinnaassaaq
Vivian Motzfeldt nassuiaavoq Atassut sinnerlugu politikeri tikinnerminit ullut tallimassaanni misissortereersimaleruni, tunillatsissimananilu paasereruniuk anisinnaaqqilerumaartoq.
- Ullulli tallimat qaangiutereertillugit aamma coronavirus timimiilersinnaasarpoq tunillaassuititsilerlunilu. Taamaammat tikittut tamarmik piffissami siullermi mianersorluinnarnissaannit peqquneqarput. Taamaammat siulittaasoqarfiup tamarmiusup aalajangerpaa 12. novemberimiit ataatsimiinnerni pineqartoq peqataalerumaartoq, oqarpoq.
Ilanngullugu erseqqissaavoq Inatsisartuni ilaasortat arlallit napparsimarujussuarnissamut ulorianartorsiorsinnaasut, ilaatigut ukioqqortuneq pissutigalugu.
- Aamma suliffipput suliffinnut allanut sanillersuunneqarsinnaagunanngilaq. Inersuarmiittarpugut akunnerpassuarni, ataatsimiititalianilu akunnerpassuarni aamma ataatsimiittarluta, immitsinnut qanittuarakasiulluta. Oqaluttarfik ataaseq tamatta oqaluttarfigigarput aamma. Taamaammat politikkikkut sulineq unittuussanngippat, immikkut ittumik mianersorluinnartariaqarpugut, oqarpoq.