Inatsisartut: Bentiaraq ulluni 14-ini ataatsimeeqataassanngilaq
Atassummi sinniisoq, Bentiaraq Bendtsen Ottosen Danmarkimiit tikinnerminit ullut 14-it mattusimaqqaarluni aatsaat ataatsimeeqataasinnaasoq, Inatsisartuni siulittaasoqarfiup aalajangerpaa. Tamanna tamat oqartussaaneranut innarliineruvoq, Ottosen isumaqarpoq.
Malittarisassaq ersarippoq.
Ulluni 14-ini angerlarsimaannarit, imaluunniit Danmarkimiit tikinnerniit ullut tallimassaanni misissorteqqigit. Misissorteqqereernerpit takutippagu coronavirusimik tunillatsissimanngitsutit, taava angerlarsimaannarnissat atorunnaassaaq.
Malittarisassarli taanna Atassut sinnerlugu sinniisumut siullermut, Bentiaraq Bendtsen Ottosenimut atuutinngilaq. Taanna Nuummut ippassaq tikippoq. Tikereernerminit Inatsisartut siulittaasoqarfimmit ilisimatinneqarpoq tikinnerminit ullut 14-it qaangiuppata ataatsimiittarfimmut tikilluaqqusaajumaartoq.
- Nakorsaanerup naliliinera sakkugalugu siulittaasoqarfimmit pissaanermik atornerluinertut taasinnaavara. Mattusimagallarninni naalakkersuisoqatigiit malunnaatilimmik amerlanerussuteqarnerulerput. Inatsisartuni sulinermi tamat oqartussaaneranik ingerlatsineq innarlerneqarpoq, Ottosen Sermitsiaq.AG-mut oqarpoq.
Tunngavilersuut
Siulittaasoqarfik sinniisumut tunngavilersuuteqarluni allagaqarsimavoq Inatsisartuni ilaasortat toqqissisimallutik sulisussaanerat pillugu:
- Inatsisartunut ilaasortat sulisullu tamarmik Inatsisartut ataatsimiittarfianni partiillu torsuusaanni sulinerminni toqqissisimanissamik pisariaqartitsipput, taamaammat Nunatta Nakorsaanera isumasioriarlugu Siulittaasoqarfimmi aalajangiunneqarpoq aatsaat sisamanngornermi ulloq 12. november Inatsisartut illorsuannut isersinnaassasutit, siulittaasoqarfiup tunngavilersuutaani allassimavoq.
Bentiaraq Bendtsen Ottosenilli erseqqissarpaa inuiaqatigiinni pingaarutilimmik suliaqartut, soorlu peqqinnissaqarfimmi sulisut, mattusimaqqaaratik tikinniutaa suliartortinneqartartut.
- Taava sooq angalaqatikka ulluni taakkunani mattusimaqqaassanngillat, uangali ulluni 14-ini mattusimaqqaassallunga, Ottosen aperivoq.
Ataatsimiinnerit ullui arfinillit peqataaffigissanngilai
Atassut Inatsisartuni marlunnik ilaasortaatitaqarpoq. Siverth K. Heilmann coronavirusimut tunillatsissagaluaruni perululersinnaanini ernummatigalugu, Inatsisartuni sulinngiffeqassalluni aalajangerpoq, Maniitsumullu angerlarluni.
Taamaammat Atassut sinnerlugu politikeri, Danmarkimiit nunatsinnukarpoq, Heilmann sinnerlugu Inatsisartuni ukiaanerani ataatsimeeqataassalluni.
Bentiaraq Bendtsen Ottosen ulluni 14-ini ataatsimeeqataanngikkuni, ataatsimiiffiusut ullut arfinillit peqataaffiginngitsoortussanngorpai.
Piffissami tassani Atassutip siulittaasua, Aqqalu Jerimiassen, partiiminit Inatsisartuni politikkikkut kisimi suliaqartussanngorpoq.
- Tamanna aamma isumaqarpoq parteerput, illuatungiliuttunilu suleqatigut, taasinermik ataatsimik annaasaqarmata. Tamat oqartussaaneranni sulineq innarlerneqarujussuarpoq, Aqqalu Jerimiassen oqarpoq.
Iperagaarusuppoq
Bentiaraq Bendtsen Ottosen ulluni tullerni, ataasinngorneq ilanngullugu, ullut tamakkiallugit misissortittarumalluni piumasaqarsimagaluarpoq. Napparsimanermulli ersiuteqanngimmat taamaasiorsinnaanngitsoq ilisimatinneqarsimavoq.
Partiip siulittaasuata, Inatsisartuni aamma ilaasortaasup, iseqqusaannginnerup sivikillinissaa pillugu siulittaasoqarfik ataatsimeeqatiserissavaa.
- Paasisinnaavara tunillatsittoqarnissamut ernumasoqartoq. Kisianni kusananngilluinnarpoq ullut 14-it mattussaaqqassaguma, allammi ullut tallimassaanni misissortereeraangamik suliatorsinnaapput. Immikkoortitsineq kusananngilaq, tamat oqartussaanerani suliaqartuulluni, Bentiaraq Bendtsen Ottosen oqarpoq.
Sermitsiaq.AG siulittaasoqarfimmut saaffiginnissuteqarpoq. Siulittaasoqarfik nassuiaavoq Bentiaraq Bendtsen Ottosen tikinnerminit ullut tallimassaanni misissortereeruni anisinnaalerumaartoq, tikinnerminilli ullut 14-it qaangiuppata Inatsisartunukarsinnaalissasoq. Taama aalajangerneq mianersorluinnarnermit tunngaveqarpoq.