Aningaasaqarnermut Ataatsimiititaliami ilaasortat angerlarsimaffimminni mattusimatinneqartut
Aasianni coronamik tunillatsittoqarsimasoq paasineqarmat Inatsisartut Aningaasaqarnemut Ataatsimiititaliaani ilaasortat angerlarsimaffimminni mattusimatinneqalersimapput. Tunillatsissimasumut ilaqutaasup Nuummi ataatsimiitialimi ataatsimeeqataasimanera pissutigalugu. Tamanna Sermitsiaq.AG-mit paasineqarpoq.
Coronavirusimik tunillatsissimasumik 17-issaannik paasisaqartoqarsimavoq, maannalu allanik tunillatsissimasinnaasunik ujaasineq siaruatsaaliuinerlu aallartinneqarsimalluni.
Tamatuma malitsigisaanik nunatta nakorsaaneranit Aningaasaqarnermut Ataatsimiititaliami ilaasortat angerlarsimaffimminni mattusimanissaat piumasarineqarsimavoq, tunillatsissimasumut Aasianneersumut ilaqutaasup, covid-19-imik tunillatsissimasinnaasup ataatsimeeqataasimanera pissutigalugu.
Inersuarmi ataatsimiinnissaq taamaatiinnarneqartoq
Sermitsiaq.AG-p paasissutissaatai naapertorlugit, Inatsisartut Siulittaasoqarfianit pingasunngormat unnukkut partiinut tamanut, Inatsisartunut Naalakkersuisunullu allakkanik nassiussisoqarsimavoq, tassani ilisimatitsissutigineqarluni sisamanngornermi oktobarip 22-ani inersuarmi ataatsimiinnissaq kinguartinneqarsimasoq pisup erseqqissumik paasineqarnissaata tungaanut.
Tassani tunngavigineqarsimavoq, ataatsimiititaliami ilaasortat inersuarmi peqataatinnagit Inatsisartut aalajangiisinnaassuseqannginnerat.
Siulittaasoqarfimmit siunnersuutigineqarpoq, Inatsisartuni ilaasortat sinnerisa ”ullormi pineqartumi allaffimminnukannginnissaat”.
Nunatsinnut tikissimasup Aasianni pingasunngormat ualikkut misissorteqqinnerani nutaamik tunillatsittoqarsimasoq paasineqarsimavoq.