Meeqqat atuarfiannut ukioq pingaarutilik

Sivitsunngitsoq meeqqat nunarput tamakkerlugu 2016/17-imi atuarlutik aallartissapput, naallu tamanna nuannersuugaluartoq, piffinni arlalinni ilerasuuteqarnissamut patsisissaqarpoq.

Meeqqammi atuarfiat ajornartorsiorpoq. Piffinni arlalinni avatangiisit asiusimapput, ilinniartitsisussaaleqineq nalinginnaasuuvoq - ingammik illoqarfiit annerit avataanni, atuartullu amerlasuut ilinniagassanik naapertuuttunit meeqqat atuarfiannit isumagineqarneq ajorput.

Atuaruk: Nuummut atuariartarneq Ittoqqortoormiormiut maalaarutigaat

Pitsaassuseq naammanngitsoq
Tamanna meeqqat atuarfiannik siorna naliliinerup ersersippaa, kingornalu meeqqat atuariata pitsaassusaa tusagassiuutini annertuumik oqallisigineqarpoq. Peqatigisaanillu ilinniartitsisut politikerillu maanna ukiup atuarfiusup nutaap aallartilerneranut atatillugu innuttaasut atuarfik ataatsimoorfigissagaat kaammattuipput.

Atuartitaanermullu naalakkersuisoq Nivi Olsen naapertorlugu pissutsit imaannaanngitsuupput. Peqatigisaanillu meeqqat atuarfiat politikimut tunngatillugu ‘kommunit tamakkiisumik akisussaaffigigaat’ erseqqissaateqarpoq.

Atuaruk: Danmarkimi atuartunut Kalaallit Nunaat pillugu ilinniutit nutaat

Arlalitsigut unammillernartulik
- Atuarfiit pisortaasa kommunillu ingerlatsiviisa meeqqat atuarfiannik naliliineq atuarluarsimassagaat taannalu ukiumi atuarfiusussami pilersaarusiornerminni ilaatissimassagaat neriullungalu naatsorsuutigaara, taanna oqarpoq, imalu nangippoq:

- Meeqqat atuarfipput suli ilinniagassatigut pitsaassutsikkullu ajornartorsiorpoq, – Taamaammallu ulluinnarni meeqqat atuarfimmi atugarissaarnerannik suliaqartut, qanoq immikkut ataasiakkaarlutik suleqatigiillutillu atuartut atuartinneqarnerminni pissarsiaannik qaffassaasinnaanerlutik imminnut aperinissaat pingaaruteqarpoq.

Atuaruk_ IMAK: Ilinniarfissuup pitsaassusaa qaffasinnerusariaqarpoq

Allaaserisaq tamaat AG-mi uani sapaatip akunnerani saqqummertumi atuaruk. Aviisi aamma uani pisiarisinnaavat:

AG Uge 32 2016

Klik her for at læse