atuartitaaneq
Danmarkimi atuartunut Kalaallit Nunaat pillugu ilinniutit nutaat
Københavnimi Kalaallit Illuutaata maajip 9-anni webportali nutaaq, Kalaallit Nunaat pillugu ilinniutilik imalik, ammassavaa
Sapaatip akunnerata tulliani, ataasinngorpat maajip 9-anni Københavnimi Kalaallit Illuutaata webportali nutaaq, dagensgrønland.dk, Kalaallit Nunaat pillugu ilinniutinik imalik qallunaanullu meeqqat atuarfianni atuartunut naatsorsuussaq, ammassavaa.
Københavnimi Kalaallit Illuutaat tusagassiorfinnut nalunaarutikkut taamatut paasissutissiivoq.
Misigisassarsiorluni angalaneq
Dagens Grønland Kalaallit Nunaannut nutaaliaasumut misigisassarsiorluni angalaneruvoq, Naalagaaffeqatigiit avannarlersaanni inuuneq pillugu Danmarkimi meeqqat atuarfianni atuartut eqqarsaatersorfigisinnaasaat, tupigusuffigisinnaasaat ilinniarfigisinnaasaallu.
Ilinniutini sammisat 13-iupput, ataatigut immikkoortortallit. Assersuutigalugu sammisat ilagaat aatsitassat, silap pissusiata allanngoriartornera, assartuineq kulturilu. Sammisat tamarmik kalaallit ullutsinni akunnattoorfiinik ilaqarput atuartut isummerfigisinnaasaannik, tamannalu peqatigalugu nunatsinni pissutsinut paasisaqarlutik. Akunnattoorfiusutut assersuutissat ilagaat nunaqarfiit. Innuttaasut illoqarfinnut nussornerat ilutigalugu nunaqarfiit nungukkiartornerat uggornarpa, imaluunniit tamanna ineriartornermut pissusissamisoortumik ilaaginnarpa?
Nunani Avannarlerni atorneqarsinnaavoq
– Atortut uummaarissut takutitsilluartullu, Danmarkimut tamarmut siammarsinnaasut aammalu Nunani Avannarlerni allani atorneqarsinnaasut, atorlugit ullutsinni Kalaallit Nunaata qanoq ittuuneranik siammarsaaqataanerput nuannaarutigeqaarput, Københavnimi Kalaallit Illuutaanni pisortaq Leise Johnsen oqarpoq.
Dagens Grønland Danmarkimi tunngaviusumik atuarfimmi 4. klassimiit 8. klassimut atuartunut naatsorsuussaavoq. Atorneqarput allaatigisat, assit, filmit, nipit il.il.
Københavnimi Kalaallit Illuutaata Dagens Grønland nutartertassavaa, qulakkeerlugulu portalikkut Kalaallit Nunaanni ineriartornerup ataavartumik malinnaaffigineqarnissaa. Tamanna peqatigalugu pilersaarutaavoq sammisat sammisanik nutaanik amerliartortinneqarnissaat.
Aningaasaateqarfinnit aningaasalerneqartoq
Dagens Grønland ForlagetEpsilon.dk Aps-ip, Klio Aps-ip Københavnimilu Kalaallit Illuutaata suleqatigiillutik sanasimavaat.
Suliniutd aningaasaliiffigineqarsimavoq Undervisningsministeriets Tips- og Lottopulje-nit, Det Kongelige Grønlandsfondimit, Ausgustinus Fondenimit, Brødrene Hartmanns Fondimit aamma Knud Højgaards Fondimit.
Københavnimi Kalaallit Illuutaata paasissutissiissutigaa kalaallit folketingimut ilaasortat marluki Aleq Hammond (S) Aaja Chemnitz Larsenilu (IA) saqqummiussinermut atatillugu oqaaseqaateqarniartut taamatuttaarlu Venstrep meeqqanut atuartitaanermullu oqaaseqartartua Anni Matthiesen.