Meeqqanut misilittaatigitneqartunut aappaagu utoqqatsertoqassaaq
Statsministeri Mette Frederiksen meeqqat angerlarsimaffiani Godhavnimi nukappiaqqanut ippassaq pisortatigoortumik utoqqatserpoq. Tamatuma saniatigut meeqqanut misilittaatigineqartunut nalunaarusiaq piareerpat utoqqatserniarluni siumut kalerriutigaa.
Kalaallit meeqqat 22-t, 1951-imi pinngitsaaliissummik angerlarsimaffimmit peerneqarlutik Danmarkimut aallartinneqartut, kiisami pisortatigoortumik utoqqatserfigineqassamaalerput.
Statsministerilli Mette Frederiksenip (Soc) oqaluttuarisaanermi qulaajaaneq, Naalakkersuisut siulittaasuata, Kim Kielsenip (S) aamma statsministeriusimasup Lars Løkke Rasmussenip ukioq manna isumaqatigiissutigisaat utaqqeqqaarniarpaa.
Lars Løkke Rasmussenip (V) utoqqatsissuteqarnissani itigartitsissutigisaqattaartareerpaa. Meeqqanut misilittaaffigineqartunut aamma meeqqat angerlarsimaffianni Godhavnimi meeqqanut tamanna tunngavoq.
Kisianni taassuma kingoraartaa Mette Frederiksen allatut iliuuseqarpoq, ippassarlu nukappissanut Godhavnimeersunut utoqqatsissuteqarpoq. Tamanna pisortatigoortumik utoqqatsernerani kingulliunavianngitsoq, taassuma oqalugiaammini oqaatigaa.
- Ingerlaqqinniarpunga, taanna oqalugiaammini oqarpoq.
- Qaammatip siualiani Kalaallit Nunaanni Naalakkersuisunut siulittaasoq Kim Kielsen pulaartoraara. Meeqqat kalaallit qallunaanngortinneqarnissaannik aalajangiiffigineqartut oqaluuseraagut.
- Taamani taakku meeraasut utoqqatserfigineqannginnerini, pissutsit qulaajarneqarnerannik sulineq aallartinneqarsimasup piareerneqarnissaa Kimip kissaatigaa. Tamanna ataqqivara. Kisianni utoqqatserusuppunga.
Oqaluttuarisaanermik nassuiaanissaq Kim Kielsenip aamma Lars Løkke Rasmussenip akornanni februaarimi ukioq manna isumaqatigiissutigineqarpoq.
Sulineq taamanikkut meeqqanut isumaginninnermullu ministeriusumit Mai Mercadomit aamma Peqqissutsimut, Isumaginninnermut Inatsisinillu Atuutsitsinermut naalakkersuisumit, Martha Abelsenimit aallartinneqarpoq, taakku ataatsimoorlutik suliassap nassuiarneranik suliaqarput, nassuiaanissamut sinaakkusiisumik.
Nassuiaat aappaagu juunip aallaqqaataani piareersimassaaq
Meeqqat pineqartut Kalaallit Nunaanni marlunnik oqaaseqarluni atuarfeqarnermi nutaami maligassiuisussanngortinneqarlutik ilaquttaminnit peertinneqarlutik Danmarkimut aallartinneqaramik tallimat arfineq-pingasullu akornanni ukioqarput.
Meeqqat ilaquttaminnut uteqqinngisaannarput. Arlallit qularnaatilimmik angajoqqaat akuersissuteqartinnerisigut meerarsianngortinneqarput, sinnerilu Nuummi meeqqat angerlarsimaffianni meeraanermi sinnerani najugaqarput.